Shillong, Ïaïong 14
Ki pulit ki la ïoh biang ïa kawei ka .303 rifle kaba la shah tuh bad ban kem noh ruh ïa ki lai ngut ki briew ba suba donkti ha kane ka kam tuh.
Haba pyntip ïa kane ha ka sngi Ba-ar, u Superintendent of Police ka East Khasi Hills Bah Vivek Syiem u la ong, “Ngi la ïoh jingtip ba ka la don ka jingjah jong ka rifle na ka store room jong ka factory ka MCCL ha ka 11 tarik mynta u bnai, bad ha kaba ngi la ujor da ka ejahar (FIR). Hadien ba la pynlong ïa ka jingtohkit, ngi la rah noh ïa ki ar ngut ki briew ba don jingsuba, kata u Shaiborlang Jyrwa (21 snem) bad u Sawbor Sooting (20 snem), kiba la ïalam pat ïa ngi ban leit pyni ïa ka jaka ba la buhrieh ïa katei ka rifle.”
Ïa kane ka rifle, kaba don ïa u number 3709740, la ïoh biang na ka ïing jong ka Kong Alpha Mary Jyrwa Nongsiej, kaba dei ka kmieieid (grandmother) jong u Shaiborlang Jyrwa, kaba don ha Mawkisyiem, Sohra.
Nalor kitei ki ar ngut, ki pulit ki la kem sa ïa uwei pat u briew ba la tip kyrteng kum u Teilang Sohkhia, uba la suba donkti ha kane ka kam.
“Kine ki briew kiba la shah kynnoh, ki la kubur ba ki la tuh ïa ka rifle na ka Administrative Building jong ka MCCL bad ban buhrieh hapoh ka ïing. Ngi la kurup noh ïa ka rifle bad ïa kine ki lai ngut kiba ngi la kem, ngin sa leit rah hakhmat ka ïingbishar lashai ka sngi,” la ong u SP.
