Shillong, Ïaïong 14
Ka jingshah tuh jong ki kali arshaka ka la nangjur na kawei ka sngi sha kawei pat nalor kiwei pat ki kam tuh kam thiem kiba dang ïai bteng bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong ba ka Monica Kharumnuid ka la ai ka jingujor ba ha ka step 12 tarik mynta u bnai, ki runar bym lah ban ithuh ki la tuh ïa ka arshaka jong ka, kaba don ïa u registration number ML05-Y-9724 na ka jaka sah jong ka, kaba don ha Mawlai Umjarain, Shillong.
Ha kawei pat ka khubor, ha ka 13 tarik mynta u bnai, ki runar bym lah ban ithuh, ki la tuh ïa kawei ka arshaka kaba don ïa u registration number ML05-AB-2239 kaba dei trai da u Salain Ch Sangma, na ka thaiñ Police Bazar, Shillong.
Na ka liang jong u Santanu Mondol, I/c, Usha Martin Ltd., hapoh ka L&T Phulbari (WGH) u la ai ka jingujor ba ha ka 8 tarik mynta u bnai ha ka por kumba 9.15 mynstep, u la lap ba ki runar bym lah ban tip ki dei kiei, ki la tuh ïa ki ‘copper wires, electrical wires, khyndai phew tylli ki packet jong ki wielding electrode, bad kiwei kiwei, kiba shongdor haduh kumba T.88,297/- na Zero Point, Phulbari (WGH).
Ha ka miet jong ka 8 tarik mynta u bnai, ki runar bym lah ban ithuh, ki la prong tuh hapoh kawei ka dukan ha Dermile, Tura (WGH) bad ban tuh ïa ka pisa bad bun kiwei ki tiar kiba shongdor kumba T.45,000/-.
Na ka liang jong u Nasir Hussain u la ai ka jingujor ba ha ka por ba um shym la don ha ïing, ki runar bym lah ban ithuh ki la prong tuh hapoh ka ïing kaba don ha Fancy Valley, Tura (WGH) bad ban pynjot pynpra ïa ki jingdon jingem hapoh ka ïing jong u.
Ha kawei pat ka khubor, ka Larisha Papang ka la ai ka jingujor ba ha ka janmiet jong ka 10 tarik mynta u bnai, ki runar bym lah ban ithuh ki la prong tuh hapoh ka ïing jong ka, ha Laitkor Nongdaneng, Shillong bad ban tuh ïa ka ksiar kaba shongdor haduh T.10 lak bad ruh ka pisa kaba long T.10,000/-.
Na ka liang jong u Manbhalang Mawkhiew u la ai ka jingujor sha ki pulit ba ha ka 10 tarik mynta u bnai ha ka por 5 baje mynstep, ki runar bym lah ban ithuh, ki la tuh ïa ka arshaka ka jong u kaba don ïa u registration number ML05-AC-0254 na ka phyllaw jong ka jaka sah ka jong u, kaba don ha Umkdait Nongmensong, Shillong.
