Shillong, Ïaïong 14
U Symbud Myntri Rangbah ka Jylla u Bah Prestone Tynsong u la kren shai bad pynshai kdar sha ki paidbah nongshong shnong ba kan nym don satia kano kano ka jingtei kaba neh shirta (permanent structure) ha dewlynnong Lumpongdeng.
“Ki paidbah ki dei ban sngewthuh ba kane ka mat jong ka dewlynnong Lumpongdeng, kaba ki khun samla haduh mynta ki shong shah thngan, nga kwah ban ong ba ngi kular ba kan nym don kano-kano ka jingpynjot ïa ki khlaw ki btap, ki dieng ki siej, hynrei ngin pynitynnad bad thung shuh shuh ki dieng bad kan long thik kum ka Nan Polok,” u la ong bad bynrap “Nga kwah ban kren da kaba shai, ba kan nym don kano-kano ka jingtei ba shirta ha dewlynnong Lumpongdeng.”
Haba kren sha ki lad pathai khubor ha ka sngi Ba-ar, u Bah Prestone u la ong, “Na ka liang ka Sorkar ngim khang ïa ka jingkhang jong ngi, lada ki kwah ne mano-mano ruh ban ïakynduh ngi long kiba kloi ban ïakynduh. Ka la don ka por ba ngi la ai jingbthah sha u DC ban khot ïakren hynrei kim wan. Nga ai kane ka khubor ba lada kano-kano ka mat nalor ba la pynshai ba phim sngewthuh ne shai ne artatien, ka jingkhang ka plie na ka bynta ban ïakren ban ïashai bha bad sngewthuh bha.”
U la ong, haba don kano-kano ka jingtrei, ym dei ban phylla, bad pynkynmaw ruh ba por ba sdang ban pynkhyllem dieng na ka bynta ka projek surok Shillong-Dawki, haba sdang pynkhyllem dieng ha Pomlum, ki la wan kiba pyrshah bad leit shaduh sha ïingbishar bad ong ba ka jingmut ka dei kaba dei. Ngi kwah ban pynshai ruh ba ym mut ban ong ba dei tang ka projek Sorkar ban shu ai laitlan ban leh katba mon, hynrei ki don bun ki kyndon kumno ban leh.”
“Baroh ngi long sngewkhia ïa ka mariang. Nga ruh nga kyrshan ïa ka jingsngew, hynrei pdiang pat ïa ki jingpynshai, ka Sorkar kam dei ba ka kwah ban pynjot mariang, bad ngim lah hi ruh namar ka ïingbishar ka don,” u la ong.
Halor ka jingshong shah thngan ki samla, u Bah Prestone u la ong, “Pyrkhat balei ba phin shu shah thngan bad pynshitom kai ïa ka met lajong, namar ba kaei kaba phi angnud ngi ruh ka Sorkar shwa ban shim ïa kane ka projek ngi la don ïa kata ka jingthmu ban peit lut ïa kine ki mat baroh, khnang ba ym dei ban ong ba ngi leh matlah. Na ka liang jong nga, nga sngew ban ong ba ki dei ban pyrkhat ïa kane ka jingpynshai bad ban pdiang ruh.”
Shuh shuh u Bah Prestone u la ong, “Ha Lumpongdeng yn nym don jingtei ba shirta, ka ban ktah ïa ka jingitynnad ne ïa ka mariang, ngi la buh ruh ki kyndon ban nang pynkhlaiñ bad pynitynnad shuh shuh ïa kane ka dewlynnong.”
Haba phai pat sha kawei ka bynta, u Bah Prestone u la ong, ha kaba ïadei bad ka investment ne ka jingbei tyngka kaba ka Sorkar ka la soi soskular na ka bynta ban tei ïa ka 5 Star Hotel. “Mynta ngi don tang ar tylli ki hotel ba paw ha Shillong, lada treikam ka projek, kaba nyngkong ka jingmyntoi kan dei ba ngin lah ban thungkam thungjam ïa ki samla jong ngi, kiba pass ïa kine ki line bapher bapher. Kumba 75 percent kiba trei ha kine ki ar tylli ki 5 Star Hotel, ki dei ki samla jong ngi. Kane kan long kawei na ki jingkyrkhu ban wanrah ïa ka ïohkam ïohjam (employment). Don kiba ong lada bun ki 5 Star Hotel, ïoh wan ki jingsniew ba bun jait hynrei ngeit skhem ba ngi na ka liang jong ka Sorkar ngin nym ailad ïa kiba kum kita.”
U Bah Prestone u la ong ba, “Don kiba ong ba kine ki projek ba dei tang ka jingthmu kamai spah shimet jong ki briew ba don ha ka bor, kane ka dei ka jingmut bad jingthmu ba bakla. Ka mut ba ka ‘investment’ ha New Shillong hato ka dei ka jingkamai spah shimet, em ka long bakla hynrei kaei kaba trei mynta kan dei ka jingmyntoi ïa ka lashai lashisngi bad ban long ka burom ïa ki nongshong shnong ka jylla.”
