Shillong, Ïaïong 14
U MLA ka North Shillong Constituency u Bah Adelbert Nongrum, u la ong ba ka khyndew ka dei ka jingim bad kdew ba dei ban pynneh ïa u Dewlynnong Lumpongdeng kumba long.
Ïa kane u Bah Adelbert u la pynpaw ha ka jingkren sha ki nongthoh khubor ha ka jingleit ai mynsiem jong u ïa ki nongïalam ka Green-Tech Foundation kiba ïakhun pyrshah ïa ka jingthmu ka Sorkar bad dawa weng noh ïa ka projek kaba thmu ban tei ïa ka hotel remdor ha u Dewlynnong Lumpongdeng, Umiam.
U la pynpaw ïa ka jingbym sngew ïahap ïa ka jingthmu ka Sorkar ban ai wai 60 snem ïa ka jaka kaba heh 66 akar sha ka kompeni, da kaba kdew ba ka Sorkar Jylla lyngba ka tnad Meghalaya Energy Corporation Limited (MeECL) ka ai wai 27 snem sha ka Maitshaphrang Tourism Promotion Group (MTPG) ban pynïaid kam jngohkai pyrthei ha u Lumpongdeng.
U Bah Adelbert u la pynkynmaw ba ha ki por ba la dep u la kyntu ïa u Myntri ka kam jngohkai pyrthei ban pynjlan ïa ka jingaiwai sha ka Maitshaphrang Tourism Promotion Group namarba ka la lah ban pynkylla dur ïa ka jingitynnad jong katei ka jaka bad pynpaw ba u la rah ïa kane ka mat hapoh Ïingdorbar Thawaiñ ïa kaba u Myntri ha kito ki por u la pynpaw ba kane ka mat ka dang don hapdeng ka jingïakren, hynrei kaba phylla ka long ba ka Sorkar ka la ïateh kular bad ka M/s Umiam Hotel Private Limited bad u Bah Adelbert u la ong ka Sorkar kam dei ban ïalam bakla ïa ka Ïingdorbar Thawaiñ.
Na ka liang u Bah Adelbert u la ong ba kum u nongmihkhmat u leh la ka jong ka kamram ban pynsngew sha ka Sorkar bad u la ai mynsiem ïa ki khun samla ba kin sngewthuh ïa ka jingkordor jong ka khyndew ka shyiap, u la ong “Ka jaka kaba heh 66 akar ka dei kaba la ïaryngkat bad ka jingheh jong ki 66 tylli ki madan ïalehkai phutbol.”
U la ban jur ba kum ka jaitbynriew kam dei ban hun da kaba shu sngap bad shu peitkai ïa kaba la leh da ki dkhot ka Foundation, hynrei kum kiba don ka jingkit khlieh na ka bynta ka khyndew ka shyiap ba kin ai ka jingkyrshan bad ai mynsiem na ka bynta ban dawa ïa ka hok bad ban pynneh pynsah ïa ka hok longtrai ka jaidbynriew.
