Shillong, Ïaïong 14
Khatwei tylli ki kynhun seng ka Dadenggre ki la aiti ïa ka jingujor sha u Sub-Divisional Officer (Civil), halor ka jingkynnoh pyndik ïa ki nongïalam jong ki bad ka jingbym ïaid-beit katkum ka rukom ba dei da ki bor ba bat aiñ hadien ka jingïakynad jaidbynriew ba dang shen ha Ri-lum Garo.
Ha ka shithi kaba la thoh ha ka 14 tarik u Ïaïong, ki nongmihkhmat jong ki kynhun seng bapher-bapher, ba kynthup ïa ka Garo Students’ Union, FKJGP, AAYF, bad A’chik Youth Welfare Organisation, ki la pynpaw ka jingsngewkhia halor ka jingujor ejahar pyrshah ïa ki nongïalam seng khlem ki sabut kiba tikna.
“La ïoh jingtip ba ki nongïalam jong ki kynhun seng ki la paw kyrteng ha ki ejahar kiba ïadei bad ka jingpynjulor ïa ki jingdon-jingem paidbah,” la ong ka jingujor.
Ha kajuh ka por, ka kynhun ka la kdew ïa ka mukotduma jong uwei u nongïalam uba la shah khot hajir ha Dadenggre Police Station ha ka 11 tarik Ïaïong katkum ki ejahar ba la pynngat hapoh ki kyndon jong ka BNS bad MMPO.
“Ka jingkhot hajir bad ki jingkynnoh ki paw ba ki dei kiba la pynshong nongrim lyngba ki jingkren ba shu ïohsngew nangno-re-nangno ha ka jaka jong ki sabut, ki jingpynshisha, lane ki jingïathuh jong ki nongsakhi kiba lah ban shaniah,” la ong ka shithi.
Kitei ki kynhun seng ki la kynnoh shuh-shuh ba utei u nongïalam ba shah khot hajir u la hap ban leh ïa ki eksamin ba donkam watla ym shym la kem ïa u ha ka rukom kaba dei.
“Katkum ka ka rukom treikam jong ka aiñ, ka jingleh eksamin doktor ka ju bud hadien ka jingshah kem. Ka jingpynhap ïa ki dkhot ba don burom jong ka imlang-sahlang bad u nongïalam seng uba don ka jingkitkhlieh ha kane ka rukom khlem daw kam shongnia katkum ka aiñ lait noh tang ban pyntieng bad pynjah burom ïa ki hakhmat ki paidbah,” ong ka jingujor.
Da kaba khot ïa kane kum ka “jingpynkheiñ ïa ki hok ba kongsan”, ka kynhun ka la ong ba ka rukom ban shu jied haba ujor ejahar bad ka jingkhot hajir ïa ki nongïalam ka la wanrah ïa ka jinglong-jingman jong ka jingsheptieng bad ka jingduh jingshaniah jong ki paidbah ha ki bor ba dei khmih.
Kitei ki kynhun seng ki la bynrap, “Hato kumne ki bor synshar ki siew kylliang ïa ka jingshakri jong ki kynhun seng ha Dadenggre?”
Ka jingujor ka la ban jur ïa ka bynta jong ki kynhun seng ban pynneh-pynsah ïa ka shong suk shong shngaiñ ha katei ka thaiñ.
Shuh shuh kitei ki kynhun seng ki la buh saw tylli ki jingdawa hakhmat ki bor ba dei khmih: ka jingbishar bniah ba laitluid ïa ki ejahar ba la mudui pyrshah ïa ki nongïalam, ka jingpynsangeh mardor ïa ka jingpyndik bad ka jingpynbor ban leh ïa ki eksamin doktor khlem ka jingkem, ka jingïakren bad ka bor ba dei khmih ka Sub-Division ban pynneh biang ïa ka jingshaniah, bad ka jingpynshitom pyrshah ïa ki ophisar ba bat aiñ halor ka jingkynnoh pyndonkam bakla ïa ka bor.
