Shillong, Ïaïong 14
U Symbud Myntri Rangbah ka Jylla u Bah Prestone Tynsong u la pynshai ba um pdiang satia ban ong ba kata ka SPA kan dei kaba sniew bad kaba lah ban wanrah ïa ki jingsniew bad jingjah burom.
Haba kren sha ki lad pathai khubor ha ka sngi Ba-ar, u Bah Prestone u la ong, “Ba phin ong ba ka SPA ka dei kaba sniew, ha nga, ngam lah ban pdiang namar ka dei ka bynta jong ka hotel, ka dei ka jingkilan met. Ngi hangne ngi riewspah ha ka rukom sumar Khasi, kata ka phah khem kaba dei ka sumar Khasi, kaba hap ban kyllan umphniang haba ngi don ka jingpang jingud ha ka met ka phad. Ka SPA ruh ka mut kata bad ngam sngewthuh shuh pat da kaei ka kyntien ban ong.”
U Bah Prestone u la ong, ban ong ba ka SPA kan dei kaba sniew bad ka ban wanrah ïa ki jingsniew ba har-rukom bad pynjah burom, lada ka long kumta, hap ban ong noh ïa ki kmie ki kpa ba kin nym phah shuh ïa ki khun jong ki ban leit pule ne shah hikai pyntbit ha kane ka kam.
“Nga sngewtynnad ba bun ki khun samla kiba shim ïa kane ka course ban leit pule, kiba bun kiba leit shah hikai ban ïoh syrnod khnang ba kin lah ban pynkylla ïa kata ka bynta na ka bynta ban im ja kamai na ka bynta ka lawei,” u la ong.
