Nongstoiñ, Ïaïong 14
Ha ka 14 tarik mynta u bnai ha ka por shiteng sngi ka la don ka jingpyni bor da ki Nepali ha Mawsikar jong ka thaiñ Langpih da kaba wan jynrat ïa ki jingthung jingtep kiba ki nongrep na ka shnong Mawsikar kila rep la bun tylli ki snem bad kumjuh ha kine ki sngi ha la ki jong ki lyngkha.
Ïa kane la pynthikna ruh bad pyntip da u Bah Robert Wahlang, Organising Secretary ka VPP Rambrai ha ka kyrwoh khubor bala phah.
Shuh shuh u la ïathuh ba na ka liang jong u ryngkat ka jingdon lang u MLA barim ka Nongstoiñ Constituency u Bah Diosstar Jyndiang bad kiwei kiwei ki riew rangbah ka seng, la ïoh ban sakhi hi da la ki jong ki khmat ïa ka jingleh donbor bad jingbym salia eiei jong kine ki Nepali pyrshah ïa ki nongrep jong ka shnong Mawsikar ha kaba kane ka la pynbitar shi katdei eh hynrei hadien ka jingwanpoi noh na ka liang u IC ka Langpih BOP la ïoh ban ïakren halor kane ka jingjia bad katkum ka jingsngewthuh ba na ka liang u IC u la shimkhia bha halor ka jinglong jingman ha kine ki jaka ban ai ka jingïada ïa ki paradoh parasnam hynrei kaba sngewsih patde ka long watla bunsien na ka liang jong u, u ju pyntip sha ki bor kiba halor hynrei kam don ka jingshimkhia.
Kumta na ka liang jong u Bah Robert u pynrem jur ïa ka Sorkar MDA kumjuh ruh ïa u MLA ka Rambrai Jyrngam kiba kheiñ sting palat ïa ka jingshah ñion beiñ ki nongshong shnong ha ki jaka ïakajia pud.
Shuh shuh u la ong ruh ba imat ka Sorkar ka kwah ban pynleit jingmut tang ha ki kam lilam jaka kaba pynlong ïa ka Sorkar ba kam mon ban shimkhia ïa kum kine ki jingeh jong u paidbah.
U Bah Robert u la bynrap ruh da kaba ong, “Lada ka Sorkar kam shim kam kyrkieh halor kane ka jingjia, kan hap ban bahkhlieh lada jia ei ei ïa ki nongshong shnong kane ka jaka”.
