Shillong, Ïaïong 14
U Bah Ritre Lyngdoh, Secretary General jong ka Green-Tech Foundation u la kynthoh kylla ïa ka jingkren u Symbud Myntri Rangbah ka Jylla u Bah Prestone Tynsong halor ka mat ban tei ïa ka Taj Resorts & Spa ha ka dewlynnong Lumpong-deng.
Lah ban kdew ba u Bah Prestone Tynsong ha ka lah sngi U Blei, u la ong ba ki paidbah kim dei ban don ka jingtieng ïa ka jingwan katei ka projek namar ba ka Sorkar kam don jingthmu ban tei ïa ki jingtei ba neh shirta, hynrei ki jingtei kin long tang ban pynitynnad, ka ban long kum ha Nan Polok (Wards Lake).
U Bah Ritre u la ong ba ka dewlynnong Lumpongdeng kam dei ban pynlong jaka khaïi, namarkata, ka Sorkar ka dei ban weng shisyndon ïa kane ka projek kaba thmu ban shna ïa ka Taj Resorts & Spa ha katei ka dewlynnong.
U Bah Ritre u la ther tyngeh ïa u Bah Prestone da kaba ong ba “Wat wan ban batai stad ïa ki kam bapher-bapher ba phi mut leh hangtei namar ba ki RTI bad ki jingthoh ba ka seng ka ïohpdiang na ki tnad bapher-bapher ki shai bha bad ki paidbah ruh ki la stad.”
Kum ban shu kdew ka jingïakhih shah thngan ba khlem buh por u Chairman ka Green-Tech Foundation u Bah H. Bansiewdor Nonglang ka la poi sha ka sngi kaba hynriew bad u la nang tlot ha koit ka khiah.
Ki Doktor kiba la wan ban peit ïa ka koit ka khiah ki la bthah ïa u Bah Nonglang ban shim ïa ki dawai bad ban leit noh sha ka jaka sumar ha Civil Hospital Shillong, hynrei u la kyntait war ïa kane ka jingbthah, kham hadien ki bor Magistrate ruh ki la wan ban peit ïa ka jinglong jingman u Bah Nonglang ha Madan Malki, Shillong. U Magistrate u la kyrpad ïa u Bah Nonglang ban dih dawai hynrei u la kyntait bad bthah ïa u ban ong ïa ka Sorkar ba kan phah jingthoh ban weng noh mardor ïa ka projek ha u Lumpongdeng.
