Shillong, Ïaïong 14
U Myntri Rangbah ka Jylla, u Conrad K. Sangma u la pynpaw ba um treh ban ïakren bad ki dkhot jong ka Green Tech Foundation (GTF) halor ka jingïakhih jong ki pyrshah ïa ka jingkynnoh tyrwa ban tei ïa ka Taj Umïam Resort & Spa ha dewlynnong Lum-pongdeng, da kaba pynpaw ba ïa ki jingsngew-khia jong ki la dep ban pynbeit.
“Ka jingtei kan sa long ha ka jaka kaba don mynta, ha kaba ka Orchid Barapani ka don, bad yn pynneh-pynsah ïa ka jinglong-jingman bad ka mariang jong ka dewlynnong,” la ong u Conrad.
U la ban jur ba yn ym shah ban tei neh ïa kano-kano ka jingtei ha katei ka dewlynnong, bad yn tei tang ïa ki jingtei ba shipor, kiba ïahap bad ka mariang na ka bynta ki jingïalang ba kyrpang.
Na ka liang u Conrad u la pynpaw ka jingsngewsih ba ka GTF kam sngewhun ïa ki jingkular jong ka Sorkar, da kaba ong “ka long kaba sngewsih ba kim hun namar kata ka dei ka jingshisha.”
Haba kylli la ka Sorkar kan khot ïakren ne em ïa ki nongïakhih, u Myntri Rangbah u la ong, “Ka jingsngewkhia jong ki ka long ba ïa ka ‘Hotel’ baroh kawei yn pynïeng hangtei…nga la kren shai ba kam don kaba kum kata ka jingthmu, kam don kano-kano ka jingtei ïingmala ka ban tei ha katei ka jaka, ka dewlynnong kan neh kumba long. Kumta ka long kaba shai, ngam ïohi kano-kano ka jingbym shai haba ïadei bad kane,” la ong u Conrad.
Ha kaba ïadei bad ki jingkynnoh pom dieng, u Conrad u la pynshong nongrim ïa katei ka jingjia ha ki ‘riew shimet, da kaba pynpaw ba ka kompeni kaba don bynta ha katei ka projek kam don bynta eiei.
“Ki pulit ki la pynshai ba ki don ki briew shimet kiba donkti, ym ka kompeni… kam don jingïadei eiei bad ka projek,” u la ong, da kaba kyntu ïa ki nongshong shnong ba kin sngewskhem ba kan ym don kano-kano ka jingjulor ha katei ka dewlynnong.
Ha kajuh ka por u la kyntu ïa ki nongïakhih ban ïatreilang, da kaba pynpaw ba ka projek ka thmu ban kyntiew ïa ki kam jngohkai pyrthei ha ka Jylla.
Ka GTF ka la don hapdeng ka jingïakhih shah thngan ba khlem buh por naduh ka 8 tarik u Ïaïong, da kaba dawa ban pyndam noh ïa katei ka projek, da kaba kdew ïa ki jingsngewkhia ïa ka mariang.
U Chairman ka GTF, u Bah H. Bansiewdor Nonglang u la byrngem ban bteng ïa kane ka jingïakhih tad haduh ba ka Sorkar kan ai da ka jingthoh ban pyntikna ba yn pyndam noh ïa katei ka projek.
