Shillong, Ïaïong 15
U MLA ka UDP, Bah Olan Sing Suiñ ha ka Sngi Balang u la ong ba ka ‘Rain Museum’ ïa mynta ka dang don hapdeng ka jingpyntrei ha Mawsynram bad la khmih lynti ba yn pyndep noh ïa ka hapoh shisnem.
Haba kren shaphang ki sienjam ba ïadei bad ki kam jngohkai pyrthei hapoh konstitwensi jong u, u Bah Suiñ u la ong, “Ki sienjam ba ïadei bad ki kam jngohkai pyrthei hapoh konstitwensi, kynthup ïa ka ‘Rain Museum’, mynta ki dang don hapdeng ka jingpyntrei bad ngin sa ïohi ïa ki hadien shisnem.”
Haba batai ïa ka jingpynwandur ïa katei ka jaka, u la ong ba ki nongwan jngohkai kin mad ïa ka jinghap slap hapoh katei ka jaka.
“Phin sa ïohi haba phi don hapoh jong ka ‘Museum’, phin sa sngew ba phi don ha ka ‘Rain Museum’ namarba ïa ka tnum la shna ha kata ka rukom ba ynda u slap u lang ha ka tnum bad ynda u slap un hap ha madan, phin sa ïohi ïa ka jingtuid slap na tnum sha madan,” la ong u Bah Suiñ.
Ïa kane ka projek la pyntrei ha ka jinglut kaba T.27 klur.
U Bah Suiñ u la bynrap ba yn shna ruh ïa ka pung ha sawdong jong ka ‘Museum’ ban pynbha bad pynitynnad shuh-shuh ïa katei ka jaka.
Halor ka jingpynkhreh ïa ka jaka na ka bynta katei ka projek, u MLA u la ong ba ka kam ba ïadei bad ka jingpynbeit ryntih ka long kaba donkam.
U la pynshai ba ka jingjied ïa ka jaka kan ym ktah satia ïa ki jaka rep.
“Yn shna ïa ka ha ka jaka ka bym seisoh, ym ha ka khyndew kaba sboh,” la bynrap biang u Bah Suiñ.
