Shillong, Ïaïong 15
Ka ophis u Syiem ka Hima Mylliem ka pyntip ba man la u snem ka ju pynlong ïa ka jingpynkhuid kaba kham kyrpang ïa ka Ïewduh kaba ju long lai sien ha ka shi snem nalor ka jingpynkhuid ba man la ka sngi da ki nongtrei jong ka Dorbar u Syiem Hima Mylliem.
Kane ka jingpynkhuid ïa ka Ïewduh kan long ha ka 19 tarik u Ïaïong 2026 kata kaba dei ha ka sngi u Blei bad ka jingpynkhuid kan sdang naduh ka por 9 baje mynstep haduh ban da dep ka kam. “Kane ka sngi ba la buh ban pynkhuid ïa ka Ïewduh ka hap ha ka sngi u Blei bad la shim khnang ïa kane ka sngi khnang ba u Kup Shiliang-Sem Shiliang u ba ju im jakpoh un ïoh ban thied ban pet bad ban die khlem don kano-kano ka jingthud bad khuslai eiei, kane ka jingpynkhuid kan long ruh ka jingbha na ka bynta kiba bun balang” ong ka kyrwoh khubor na u Syiem Hima Mylliem.
Khnang ba kane ka jingthmu jong ka Dorbar kan long kaba ïaid beit ïaid ryntih, la wer ïa baroh ban ai ka jingïatreilang, kumjuh ruh la kyntu ïa ki khun ki hajar ban bud ryntih ïa kine ki jingbthah ba la buh kata ba ki Nongrep kim dei ban wanrah ïa ki mar rep ha katei ka sngi, ki nongdie bad nongshong basa baroh ki dei ban pynkhuid lypa ïa la ki dukan bad ban sei ban lum ïa ki ñiut ki ñier shabar shwa ba kin khang ïa ki dukan jong ki ha ka janmiet jong ka 18 tarik Ïaïong 2026.
Ki trai kali, nongñiah kali kim bit ban pynïeng kali ha shilynter ka surok khap Ïewduh naduh Motphran/Jaka ïeng Jeep haduh Ïew Mawlong khnang ban lait na ka dheng kali ha katei ka sngi.
Kane ka long ka jingangnud bad ka jingkyrpad jong u Syiem kumjuh ka Dorbar na ka bynta ban wanrah ïa ka jingkhuid jingsuba jong ka Ïewduh, khamtam ban bit ban biang bad ban suk ban saiñ ki nongdie nongthied bad u nongwan u nongleit ïew.
