Nongstoiñ, Ïaïong 15
U Myntri Rangbah ka Jylla u Conrad K Sangma u la ong ba ïa ka dewlynnong ha Lumpongdeng yn ïada bad yn buh kumba ka long phylla namar kyrmen ba ka Taj Resort and Spa Umiam kan kylla long ka ‘Premier Wedding Destination’ ha ka pyrthei bad ngi kyrmen ba ki shijur kiba kwah ïathoh shongkurim kin hap shong da ki lieng sha ka dewlynnong bad halor dewlynnong kin don ki jaka shna rynsan bad kaba kum kane ka jingthmu kan long kaba kham phylla lehse ban ym lah ban ïoh ha ka pyrthei baroh kawei lait noh ha Umiam bad ka jingthmu jong ka Sorkar ka dei halor kata ka jingpyrshang kaba khampher ba thymmai.
U Myntri Rangbah u la ong ruh ba halor ki jingpyrshang ban ïalam bakla ba ïa ka dewlynnong yn pynjot noh ka long kaba bakla haduh katta-katta bad ha ka MoU hi la thoh shai ba kan nym don kano-kano ka jingtei kaba neh shirta halor ka dewlynnong bad yn shah tang ïa kiba shipor kum ki pandal ki rynsan bad kiwei-kiwei kiba long shipor.
Ïa kane na ka liang u Myntri Rangbah u la kren bad pynpaw ha ka jingïalang plie ïa ka building ba thymmai jong ka Nongstoiñ C&RD Block kaba la long ha ka sngi Balang.
“Ngam lah ban sngewthuh halor ka jingmut jingpyrkhat bakla ki briew ïa ka Spa bad nga sngewsynei ruh namar ka Spa ka dei tang ka kyntien nongwei hynrei lada phai sha ki ktien lajong ka Spa ka thew bad ka mut hi ïa ki jingsumar Ayurveda lane ki jingsumar tynrai bad kam don kaei-kaei kaba sniew hangta hynrei lada ki briew ki don da ki jingmut ba sniew bad ba bakla halor kata nga ngam lah ban ong eiei bad kiba kum kine ki rukom pyrkhat kin nym ïalam ïa ka Jylla ba kan kiew bad ïaid shakhmat,” ong u Conrad.
Shuh shuh u la ong ruh ba ka Taj Resort and Spa ka dei kawei ka ‘brand’ kaba la paw tam ha ka Ri bad ka pyrthei ki don ka ‘standard’ bad hap ban mutdur bad puson bha ha shwa ban kynthoh ïa kano-kano ka jingkynthoh.
U la ong ba ki khun samla jong ka Jylla ki sngewkhia halor katei ka dewlynnong bad ka long kaba dei bad ma nga ruh nga sngewkhia kumjuh kumba sngewkhia ma ki bad na kata ka daw nga pynthikna ba ha ka MoU la thoh shai ba yn nym don kano-kano ka jingtei ba junom.
