Shillong, Ïaïong 15
Ki shipai ka tnad Border Security Force (BSF) ki la ïoh ban pyllait im ïa kawei ka khynnah kaba dang 10 snem ka rta hadien ba ka la ngat ha ka jingshah bat bording ilektrik ha kawei ka jaka ba dang ïaid ka jingpyntrei ha South Garo Hills District ha ka 7 tarik mynta u bnai.
Katei ka jingjia ka la jia ha ka por kumba 11:30 baje mynstep hajan ka Wah Rongra ha kaba ka Nikhami N. Marak, ka khun jong u Lithon D. Sangma na ka shnong Rongra Bolgiske, ha ka jingbakla ka la kum leit tyngkhuh bad u ‘post’ dieng ilektrik uba par bording ha katei ka jaka.
Haba jubab ïa ka jingkynjoh ïarap ba kyrkieh, ki shipai BSF na BOP Rongra ki la her mar-mar sha katei ka jaka.
“Da kaba pyni ïa ka jingkloi ha ka jingmut-jingpyrkhat, ki la pyntip mardor sha ka tnad bording ban pynlip noh ïa ka bording, ha kawei ka liang ban ïada na ka jingma kaba kham jur,” la ong ka kyrwoh na ka BSF.
Ïa katei ka khynnah kaba la mynsaw la pynkit noh mar-mar sha Rongra Primary Health Centre na ka bynta ban ïoh ïa ka jingsumar kaba nyngkong.
“Hadien ka ‘First Aid’, la phah noh ïa ka ban ïoh shuh-shuh ka jingsumar bad hadien kata, la pynkit noh ïa ka sha Baghmara Government Hospital da ka ‘Ambulance’ jong ka BSF, ha kaba la synran lang da kawei ka ‘Nursing Assistant’ bad ki bahaïing jong ka,” la bynrap ka kyrwoh.
Ki heh ophisar ki la ong ba ka jingtuklar biang por jong ki shipai BSF ka la pyntikna ïa ka jingsumar kaba biang ha ka liang ka koit ka khiah bad ka la ïada ruh na ka jingjia kaba lah ban buh jingma ïa ka jingim.
“Ka jingjubab kloi ki shipai BSF-Meghalaya bad ka jingïarap ban pynïoh jingsumar ha ka por kaba biang lyngba ka jingkynjoh ïarap ba kyrkieh ka la seisoh ban pyllait im ïa kawei ka khynnah rit, kaba la mynsaw jur hadien ka jingshah bat bording ilektrik,” la ong ka BSF.
Haba pynskhem biang ïa ka jingkular jong ka, ka kynhun ka la bynrap, “Ka BSF ka ïaineh ha ka jingkular jong ka ban ïarap ïa ki briew bad ka bteng ban ïeng ha syndah bad ki nongshong shnong ha ka por ba donkam eh.”
