Shillong, Ïaïong 15
Ka State President ka BJP Mahila Morcha, ka Kong Arena Hynñiewta ha ka Sngi Balang ka la ïaroh ïa ka rai jong ka Sorkar Pdeng halor ka bhah kyrpang kaba 33% na ka bynta ki kynthei ha ka synshar-khadar, da kaba ong ba ka dei ka sienjam ka ban sah kynmaw bad ka ban wanrah jingkylla ha ka imlang-sahlang.
Haba pynmih ïa ka kyrwoh hadien ka jingïaid paidbah kaba la pynlong ha Nongpoh da ki samla kynthei bad ki longkmie ka Ri-Bhoi distrik, ka Kong Arena ka la ong ba ïa kane ka jingïalang la pynlong ban rah ïa ka khubor kaba kongsan sha man la ki dong, ki thaiñ, bad ki distrik ha kylleng ka Jylla.
“Ka jingthmu ka long ban pynsngewthuh sha ki kynthei ïa ka burom bad ka jingithuh ba la ai sha ki, bad kumno kane kan wanrah ïa ka jingkylla kaba manbha ha ka jingkiew bad ka roi ka par jong ka imlang-sahlang,” ka la ong.
Haba ïadei bad ka ‘Nari Shakti Vandan Adhiniyam,’ ka Kong Arena ka la kdew ba kane ka aiñ ka ailad ïa ka jingmihkhmat kaba kham bun na ka bynta ki kynthei ha ki kynhun ban thaw aiñ.
“Ka bhah kyrpang ba 33% ïa ki kynthei ha ka synshar-khadar ka dei ka sienjam ka ban sah kynmaw ha ka histori, kaba ailad ïa ki kynthei ban shim bynta kum ki nongthaw aiñ bad ki nongmihkhmat ha ki rynsan bapher-bapher kum ki Member of Parliament (MP), Member of Legislative Assembly (MLA), bad Member of District Council (MDC),” ka la ong.
“Kane ka sienjam ka pynshlur ïa ki kynthei ban ïatreilang, ban tehsong ïa ka jingïatylli, bad ban wanrah ïa ka jingkylla kaba kit jingmut,” ka la ong.
Ka la ban jur shuh-shuh ba ka jingïashim bynta jong ki kynthei ha ki kam nongïalam kan ïarap pynbeit ïa ki jingeh ba kongsan kiba ki samla ki ïakynduh.
“Ka jingïashim bynta jong ki kynthei ha ki kam nongïalam kan ïarap ruh ban pynbeit ïa kiba bun ki jingeh kiba ki samla ki ïakynduh, khamtam ha ka pule-puthi, ka kam ka jam, bad ki lad ki lynti. Haba ki kynthei ki shah pynkup bor, ki lah ban ïada bad ïalam kham bha ïa ki pateng ban wan,” la ong ka Kong Arena.
Haba pynpaw ka jingsngewnguh ïa ka Sorkar Pdeng, ka President ka la ong, “Nga kner ïa ka jingsngewnguh kaba khraw sha ka Sorkar kaba mynta na ka bynta ka jingkular jong ka bad na ka bynta ban wanrah ïa kane ka aiñ kaba kongsan na ka bynta ki kynthei. Ki kynthei kim shah teh shah khum shuh; mynta ki la ïoh bor ban ïeng na ka bynta ka hok jong ki bad ban shakri kum ki nongshong shnong ba kitkhlieh jong ka ri.”
Na ka liang ka Kong Arena ka la ai khublei ruh ïa u Myntri Rangbahduh ka ri, u Narendra Modi halor ka jingïalam jong u haba ïadei bad kane ka bynta.
“Nga pynpaw ruh ka jingsngewnguh kaba khraw ïa u Myntri Rangbahduh jong ngi, u Narendra Modi, na ka bynta ka jingïohi jngai bad jingsngewthuh jong u ïa ki jingkitkhlieh bad ki jingangnud jong ki kynthei,” ka la bynrap.
