Shillong, Ïaïong 15
U MLA ka UDP na Mawsynram Constituency bad uba dei u dkhot ka Meghalaya State Planning Board (MSBP) u Bah Olan Sing Suiñ u la ong ba ka kamram jong ka board ka long ban pynthikna ba ki tnad Sorkar kin pyntreikam ïa ki skhim ha ka lynti kaba dei, ym ban pynsngewbha ïa ki politishian.
Haba kren ha ki nongthoh khubor, u Bah Suiñ u la ong ba ka board ka ju ïakynduh man ka por hapoh ka jingpynïaid jong u AT Mondal ban bishar bniah ïa ki prokram jong ki tnad Sorkar.
“Ngi la khot jingïalang arsien bad bishar bniah ïa ki tnad bapher-bapher halor ki prokram ba ki pyntreikam, kiei ki jingduna bad ki jingeh ba ki ïakynduh haba pyntreikam ïa kum kine ki projek. Ngi ai jingmut sha ka Sorkar khnang ban lah ban pynbeit” u la ong.
U la ong ruh ba ka Planning Board kam lah ban pyntreikam ei ei, hynrei tang kawei ngi lah ban ai jingmut ïa ka sorkar ne sha ka tnad ban peit kaei ka jingïarap kaba thymmai kaba lah ban leh.
Shuh shuh u la ong ba ka Board ka dei tang ka komiti ai jingmut hynrei ki ban pyntreikam ki dei ha ki tnad bapher-bapher.
“Lada ka board ka dei tang ban pynsngewbha ki politishian kam don jingmut ei ei, hynrei ngi dang shong ban shim ïa ki sienjam ban peit la ka Jylla bad ki tnad bapher-bapher ki pyntreikam ne em ïa baroh ki skhim ha ka lynti kaba dei.”
Haba kylli halor ka jingdheng kali ha nongbah Shillong, u bah Suiñ u la ong ba ka la don ka jingduna ha kine ki san ne hynriew bnai ba la dep hadien ba la plie ïa ki surok thymmai.
U la kdew ba naduh ba la plie ïa ka surok thymmai kaba leit sha Anjalee Petrol Pump, ka la ïarap ban pynduna ïa ka jingkhapngiah. Nangta naduh ba la dep ka surok saw lynti na Umshyrpi sha Hynñiewmer Upper Shillong ka jingkhapngiah kali ka la nang duna.
“Man la ka por haba nga leit na kane ka jaka sha Upper Shillong ka shim por shi kynta bad mynta ka ju shim por 15-20 minit. Nga ïohi ha kane ka shibnai ïa ka jingpher ha ka jingkhapngiah kali haba ïanujor bad ki saw – san bnai mynshwa.” U la ong.
