Shillong, Ïaïong 15
Ka Director jong ka tnad Tourism ka Jylla ka Kong B. L. Pakynteiñ ha ka jingïalang bad ki nong-ïalam ka Green-Tech Foundation ka la kren shai ba kam don kano-kano ka projek ba ka Sorkar ka thmu ban shna ha ka Dewlynnong Lumpongdeng.
Haba kren halor ka jingpyrshah kumjuh ka jingdawa ka Green-Tech Foundation ban weng ïa ka projek ha Lumpong-deng, ka Director ka la pynpaw ba ka jingtei ïa ki Hotel ka dei ha Orchid Umiam, ym ha ka Dewlynnong Lumpong-deng.
Ka Director ka la pynpaw ïa ka jingsngewkhia halor ka jinglong jingman bad ka kyntu jur ïa u Chairman jong ka Foundation ban sangeh noh shuwa ïa ka jingïa-khih shah thngan bad ka Sorkar ka pdiang ïa ka kano-kano ka jingïakren ban weng ïa ka jing-sngewthuh bakla khnang ban ïada ïa ka Mariang.
Haba kren sha ki nongthoh khubor ka Kong Pakynteiñ ka la pynshai ba ka Sorkar ruh ka don kajuh ka thong kumba ka Foundation ka kwah ban pynneh pynsah ïa ka mariang bad ban pynitynnad ïa katei ka jaka.
Ka Kong Pakynteiñ ka la pyntikna ba ka Sorkar kam don kano-kano ka jingthmu ban tei ïa ki ïing ne ki dukan kiba neh (permanent construction) ha Lumpongdeng.
Ka la ong ba ka thong ka long ban ailad ïa ki nongleit jngohkai ba kin lah ban ïohi bad mad ïa ki jingitynnad ka Mariang ha katei ka jaka kaba don shisha ïa ka jingitynnad, “Ki mat ba ka kynhun ka dawa ki ïadei bad ka thong jong ngi, kata ka long ban kyntiew ïa ka jaka khlem da pynkylla ïa ka dur ba itynnad jong ka Mariang,” ka la ong.
Ka la batai ba ka Sorkar ka thmu tang ban wanrah ïa ka ‘Experiential Tourism’ lane ka rukom jingleit jngohkai kaba ailad ïa ki briew ban mad ïa ka jingitynnad ka Mariang bad kane ruh kan long kaba ka Sorkar kan da bishar bniah na ka por sha ka por.
Ka Director ka la kyntu ïa ka Foundation ban sangeh noh ka jingïakhih namar kane ka ïadei bad ka jingim briew bad ka Sorkar ka long kaba kloi ban ïakren man ka por.
“Ngi pdiang ïa ka jingai jingmut, ka jingïasyllok bad ka jingïakren. Ki don ka hok ban pynpaw ïa ka jingpyrshah, hynrei ngi kyntu ba ym dei ban don kano-kano ka jingktah ïa ka met ka phad lane ka jingim jong ki dkhot kiba ïakhih,” la kyntu ka Kong Pakynteiñ.
