Nongstoiñ, Ïaïong 15
U Myntri Rangbah ka Jylla u Conrad K Sangma ha ka sngi Balang u la ïoh ban pyndep ïa san tylli ki prokram bapher-bapher ha West Khasi Hills District ba kynthup ïa ka jingplie ïa ka Multipurpose cum Dorbar Hall ka New Nongstoiñ, ka jingplie ïa ka building ba thymmai jong ka Nongstoiñ C&RD Block, ka jingplie ïa ka PRIME Hub ha Pyndenglawar, ka jingplie ïa ka skul RMSA ha Mawlieh, bad jingïakynduh lang bad ki nongshong shnong ka Kseh-kohlong (Community Interaction Programme).
Ha kane ka sngi u Myntri Rangbah ha shuwa ban plie ïa ka Multipurpose Cum Dorbar Hall ka New Nongstoiñ, ha ka jingdonlang u MLA ka Nongstoiñ Bah Gabriel Wahlang u la hiar bad ïaid da ka kjat hapoh Ïew Nongstoiñ ban ïakynduh bad pajut kti bad ki nongshong Ïew.
U Myntri Rangbah haba kren kum u kongsan ha ka jingïalang plie ïa katei ka Hall u la pynpaw ïa ka jingsngewkmen shikatdei eh ba un ïoh ban ïadonlang ha katei ka prokram plie ïa ka dorbar hall.
U la pynpaw ruh ïa ka jingsngewkmen ban ïohi ba ki paidbah ha ryngkat ka Sorkar lem bad ki nongïalam khlem da ïa sngew seng ne sngew saiñpyrthei kila ïasnoh kti lang ban shakri na ka bynta ka Jylla bad ka Hall ka dei ka nuksa kaba itynnad bha jong ki nongmihkhmat ba la jied bad ki nongshong shnong kiba ïawan lang ban thaw ïa ka jaka kaba itynnad na ka bynta ka imlang sahlang.
U la ong ruh ba ha ki 8 snem bala leit ka Sorkar MDA kala ïohlad ban shakri ïa u paidbah ka Jylla bad ka thong jong ka Sorkar ka long ba kan nym ieh shadien ïa kano-kano ka District bad ki thaiñ.
U la ong ruh ha ki 8 snem bala leit tang ha West Khasi Hills, ka Sorkar kala lah ban theh haduh kumba 120 tylli ki projek kam pynroi kaba kot haduh kumba1,315 klur.
U la pynbna ba ka Sorkar ka la rai ban buh ïa ki Convention Centre ha man la ki District Headquarter bad u la ïathuh ruh ba ka DPR na ka bynta ka Nongstoiñ Convention Centre ka la long kaba la pynkhreh bad yn sa mang ïa ka ha ka dor T.27 klur bad ba yn sdang ban shna mynta u snem.
Shuh shuh ha kaba ïadei bad ki jingtei na ka bynta ki kam ïalehkai ha Nongstoiñ, u Conrad u la ong ba na ka liang u MLA ka Nongstoiñ u la phah ïa ka jingtyrwa ka jong u sha ka Sorkar na ka bynta ban pynïoh ïa ka madan phlang plastic kaba 9 klur shiteng bad nga la peit bniah ïa ka jingtyrwa jong u MLA, hynrei u la ong ba ïa kane yn sa dang ïakren bniah bad u MLA ryngkat ki paidbah nongshong shnong khnang ba yn lah ban tei ïa ka madan phlang ha ryngkat u synthetic track bad hapoh mynta hi u snem yn sa mang pisa noh.
U la ong ruh ba ïa ka surok na Nongstoiñ sha Sohpian yn mang T.22 klur, kumjuh ruh ka Sorkar ka dang wad bniah ban shna ïa ka Marketing Complex ha ka thaiñ Nongstoiñ ban buh ïa ki nongdie madan trai ri.
Ha kane ka sngi la don lang ruh u RG Momin, MLA ka Rambrai, u Bah Lurshai Kharbani MDC ka Rambrai, Bah Sraly Rashir MDC ka Mawshynrut ha kajuh ka por kum u Sordar ka shnong New Nongstoiñ, u SP bad DC ka WKH, u Bah G Marbaniang, Secretary ka shnong New Nongstoiñ, ki nongkitkam ka NNSSCC kiba la aiti ruh ïa ka dorkhas sha u Myntri Rangbah, ki riew rangbah, ki khynnah skul bad kiwei kiwei.
