Shillong, Ïaïong 15
Ka MDC jong ka Narpuh Constituency ka Kong Deiwi Tongper ka la ong ba ki karkhana shna Dewbilat kiba don ha Rilum Jaiñtia ki ai kam tang 30% ïa ki trai Jylla katba ïa ki ba bun ki kam ki kompeni ki wanrah da ki briew ba nabar bad ka jingwanrung ki briew ba nabar ruh ka nangjur katba nang mih ki sngi.
Ïa kane ka Kong Deiwi ka la pynpaw haba ai jingkren haba ka wan ban ai jingkyrshan ïa ka jingïakhih u Chairman ka Green-Tech Foundation ban dawa ba dei ban weng noh shi syndon ïa ka jingthmu ka Sorkar ban tei Hotel remdor ha ka Dewlynnong Lumpongdeng, Umiam.
Ka Kong Deiwi ka la pynpaw ba ki karkhana shna Dewbilat ha Rilum Jaiñtia ki kular ban ai kam ai jam haba ki wan ha ka Jylla, hynrei kam long kumba ki la kular bad ka jingwan jong ki kam pynmyntoi eiei ruh ïa ka Jylla bad ïa ki khun samla ba wad kam wad jam jong ka Jylla.
Namar kata ka Kong Deiwi ka la kyntu ïa ki shnong ki thaw, ki sengbhalang ban ai ka jingkyrshan bad ka jingïasnoh kti lang ha ka jingïakhih jong ka Foundation.
