Shillong, Ïaïong 15
Ki lai ngut kiba la shah kem namar ka jingtuh ïa ka .303 Rifle na ka kamra buh tiar jong ka karkhana MCCL ha Sohra ka long da ka jingthmu ban die bad shna pisa, pyntip u Superintendent of Police ka East Khasi Hills Bah Vivek Syiem ha ka sngi Balang.
Ki pulit kila ïoh kurup noh ïa ka suloi ba shah tuh, kaba don u number 3709740, na ka ïing jong ka Kong Alpha Mary Jyrwa, ka kmie-ieid jong uwei na kiba shah kem, na Mawkisyiem, Sohra. Kane ka suloi la pyntip ba kala jah ha ka 11 tarik Ïaïong.
U SP u la ong ba ki pulit ka thanad Sohra ki la trei shitom bad buddien ïa ki briew kiba donkti ha kane ka kam bad dei hynnin ka sngi ba ki la kem noh ïa ki lai ngut bad kine ki dei kiba la tip kyrteng kum u Shaiborlang Jyrwa, Sawbor Sooting bad Teilang Sohkhia.
“Ka jingthmu jong kine ki briew ka dei ban die ïa kane ka rifle sha ki briew ba ju siat mrad bad sim. Ka jingthmu hi ka dei ban ïoh pisa na kane ka kam. Mano mano ruh kiba kwah ban thied tiar, khamtam kito kiba kwah ban leit siat mrad, ki lah ban pyndonkam ïa ka,” u la ong.
U SP u la pyntip ruh ba ka jingtohkit ïa kitei ki lai ngut ka dang ïaid shakhmat.
U SP u la pynpaw ruh ba ka dei na ka jingbym buh bha, kaba la pynlong ba kan shah tuh. “Ka tiar ka paw ba khlem shym la buh bha ha ka jaka kaba dei bad dei lyngba kane, ba kine ki nongtuh ki la ïoh ban tuh,” u la ong.
