Shillong, Ïaïong 15
Ki Doktor ka District Medical and Health Officer (DMHO) haba wan ban peit ïa ka koit ka khiah jong u Bah H Bansiewdor Nonglang u Chairman ka Green-Tech Foundation ki la pynpaw ba ka met jong u ka la donkam ïa ka bam namar ba ka jingshah thngan jong u ka la dap Hynñiew sngi.
Haba ïoh ban ïakren ïa ki Doktor kiba la peit bad bishar ïa ka koit ka khiah jong u Chairman ka Foundation ki la ïathuh ba ka met jong u Bah Nonglang ka la tyrkhong palat bad ïathuh ba ka la hiar ka shini katba ka ‘Blood Pressure’ pat ka dang biang bad pynpaw ba u don ka jingktha khlieh.
Kum ban shu kdew ba ka jingshong shah thngan ba khlem buh por u Bah H Bansiewdor Nonglang ka dei halor ka jingdawa ba ka Sorkar ka dei ban weng mardor ïa ka projek Dewlynnong Lumpongdeng.
Shuh-shuh ba ka Sorkar lyngba ka tnad kam jngohkai pyrthei ka la pynmih ruh ïa ka jingpyntip kaba khot ïakren ïa ka Foundation ha kaba ki nongïalam jong ka Foundation ba kynthup ïa u Bah Wallam K. Nongsiej (Advicer GTF) bad u Bah Ritre Lyngdoh Secretary General ki la leit ban mihkhmat ha ka jingïalang ba la long bad ka Director.
Ki nongïalam jong ka Foundation ki la mih na ka jingïalang khlem da ïoh ïa ka jubab kaba pynhun namar ba ka Sorkar kam weng satia ïa ka projek bad kaba la pynlong ïa u Chairman ka Foundation ban dang bteng ïa ka jingshong ïakhih shah thang ha madan Malki ban ïaineh beit ha ka nongrim ba ka Foundation ka dawa naduh kaba sdang.
