Shillong, Ïaïong 15:
Ki pulit ka East Khasi Hills District ki la ïoh ban ïalam ïa u Kennedy Khongsit 32 snem ka rta uba la suba ban pynïap ïa ka Kong Eilang Phawa ban phah batai ïa u kumno ba u pynïap bad bret sha ka wah.
Ka jingïalam ki pulit ïa u Kennedy ka dei mynta ka sngi Balang ban pyni ba u la tan ïa ka metïap ka Kong Eilang Phawa na ka wah bad ieh kham sharum kaba la lap mynha ka 6 tarik mynta u bnai ïa ka metïap kaba la thep hapoh ka byrni.
Shuh shuh ki pulit ki la ïalam ïa u Kennedy ban phah kdew ha kiwei ki jaka ba u ïalam ïa ka Kong Eilang hashuwa ba un pynïap ïa ka.
La ïohi ba ki pulit ki la ïalam nyngkong sha kawei ka dukan kaba don ha Nongrah Lummarboh kaba u Kennedy bad ka Kong Eilang ki la ïa dihsha lang. Nangta pat ki pulit ki la ïalam sa sha katei ka wah khappud Nongrah Lummarboh bad Rynjah ban phah kdew kumno u la bret ïa ka metïap ka Kong Eilang kaba u la thep hapoh ka byrni.
Ki pulit ki la hiar lang ruh ryngkat u Kennedy sha katei ka wah ban lap bad ïoh ïa ki sakhi kiba biang halor ka jingsuba donkti pynïap ïa ka Kong Eilang Phawa.
Ka Kong Eilang Phawa ka la jah na ïingsah naduh ka 20 tarik u Lber 2026, bad la lap pat ïa ka metïap jong ka ha ka wah Nongrah Lummarboh khappud bad Rynjah kaba la suba ba dei u Kennedy uba la pynïap.
Kum ban shu kdew ba u Kennedy u la shah kem noh ha ki pulit ha ka 1 tarik mynta u bnai hadien ka jingsuba donkti pynïap ïa u heprit Kyrshanbor Kharmudai hadien hynriew bnai ba u la pynïap bad hadien kata ki pulit ki la ïoh jingtip ruh ba u Kennedy u la donkti ban pynïap ïa ka Kong Eilang Phawa.
Haba kren sha ki lad pathai khubor u Bah Dennis Lynrah, Rangbah Shnong ka Nongrah u la dawa ba ka aiñ kan shimkhia mardor bad ïa kiba kum kine ki briew ba leh ïa ki kam pynïap kim dei shuh ban lait.
Kumta u la ai khublei ïa ka tnad pulit khamtam ïa ka Special Investigation Team kiba la trei shitom ban lap ïa uba donkti pynïap, ïa ki pulit ka Rynjah Police Station namar mar shu ai ejahar ki la mih wut wut ban wad ïa ki briew kiba donkti haduh ban da lap ïa u briew uba la suba donkti ha kine ki kam.
Shuh shuh u la kyrpad sha baroh ki longïing kiba ha ka shnong Nongrah ba kin buh noh da ki kor CCTV khnang ban long ka jingïada lada jia kum kine ki jingjia.
