Shillong, Ïaïong 15
U Chairman jong ka Green Tech Foundation (GTF) Bah H Bansiewdor Nonglang un nym weng satia ïa ka jingïakhih shong shah thngan kaba khlem buh por hadien ba ka tnad Tourism ka la kyntait ban pyndam ïa ka soskular ba kynthup ïa ka dewlynnong Lumpongdeng ha ka Taj Resort & Spa project.
Ïa kane ka rai la shim hadien ka jingïalang bad ka Director jong ka tnad Tourism Kong BL Pakyntein ha kaba ym shym la ïoh ka jingkular ban pyndam noh ïa kane ka projek.
“Mynta ka sngi, kaba dei ruh ka sngi kaba hynñiew jong ka jingshong shah thngan ba khlem buh por, u Chairman jong ngi, u la nangtlot nangtlot katba ki sngi ki dang ïaid. Ha ka step jong ka sngi Balang, ki bor pynïaid district ki la bthah ïa ngi ban ïakynduh bad ka Director jong ka tnad Tourism Kong BL Pakyntein,” la ong u Secretary General ka GTF Bah Ritre Lyngdoh ha ka sngi Balang.
U la bynrap ruh ba ïa kane ka jingïalang la khot pynlong ha ka por kaba lyngkot khlem kano-kano ka jingthoh.
“Hynrei, kim shym la wan bad ka jingthoh bad ha ka por janmiet ha ka por kumba 4.40 eiei, ngi la ïoh pdiang ka shithi kaba ong ba kan don ka jingïakynduh, kaba la khot pynlong da ka Director ka tnad Tourism,” u la ong.
“Hadien ba ngi la shong jingïalang hapdeng para dkhot, ngi la shim ka rai ba ngin leit ban ïashim bynta ha ka jingïalang,” la ong u Bah Ritre.
Haba ïathuh halor ka jingmih, u la ong ba ka tnad ka la ïeng beit halor ka nongrim ban kynthup lang ïa ka dewlynnong hapoh ka projek.
“Ka jingmih na ka jingïalang ka long kaba sngewsih shibun. Ngi la shong ïakhih jai jai la palat hynriew sngi da ka jingkyrmen ba kan don ka jingmih kaba pynhun na ka liang jong ka Sorkar, ba kin pyndam noh ïa ka projek. Hynrei hadien ka jingïatai halor kiba bun ki mat kiba ïadei bad ka mariang, kaba dei ruh ka mat pdeng jong ka jingïakren, ka tnad Tourism ka la long eh ban pyndam ïa ka soskular kaba kdew ïa ka dewlynnong Lumpongdeng, ka ban dei ka bynta jong ka Resort bad Spa,” u la ong.
Hadien kane ka jingïalang, ka GTF ka la pynbna ba kan nangpynjur shuh shuh ïa kane ka jingïakhih.
