Shillong, Ïaïong 15
Ki longkmie ba na ka them Ri-Bhoi ki la shim ïa ka rai ban ai ka jingkyrshan ïa ka jingïakhih ka Green-Tech Foundation ban ïa shimbynta lang ka jingshah thngan ryngkat u nongïalam jong ka Foundation.
Ka President ka Women Organisation of Ri-Bhoi District ka Kong Mira June Marsing ha ka sngi Balang ka la pyntip ba na ka liang ki dkhot jong ka WoRD ki la shim ïa ka rai ban sdang ïa ka jingshah thngan naduh ka 16 tarik u Ïaïong 2026 ban ai ka jingkyrshan pura ïa ka jingdawa jong ka Green-Tech Foundation ba ka Sorkar ka dei ban weng mardor ïa ka jingthmu ban tei ïa ki hotel remdor ha ka Dewlynnong Lumpongdeng.
Ka Kong Mira ka la pynpaw ïa ka jingsngewkhia ba kum ki longkmie kiba don ka jingkitkhlieh ki sngew diaw bad sngewkhia halor ka jingshah thngan u Bah Nonglang kaba la ïaid mynta la hynñiew sngi lynter u ba ïakhih na ka bynta ka lawei ki khun ka pateng ban wan.
Shuh-shuh ka la ong ba na ka liang ka Sorkar MDA-II ka la rai ban ai wai 60 snem ïa ka Lumpongdeng kaba don hapdeng jong ka Umiam bad bynrap ba ynda ka Sorkar ka la aiti ïa katei ka dewlynnong ha ki kompeni ba nabar, ka la ban jur ba ka kyrteng jong ka wah Umiam ruh kan sa jah noh bad kumjuh ka Ri Bhoi Anthem.
