Shillong, Ïaïong 16
Ka President jong ka Women Organisation of Ri Bhoi District (WORD) ka Kong Mira June Marsing ha ka por 7 baje janmiet jong ka 16 tarik u Ïaïong 2026 ka la sdang ïa ka jingshah thngan ba 12 kynta ha madan Malki ban ïa shimbynta lang ryngkat ka jingshah thngan u Bah H. Bansiewdor Nonglang Chairman jong ka Green-Tech Foundation kaba la poi sha ka sngi kaba phra.
Ka Kong Mira ka la ong ba kane ka jingïashimbynta jong ka ban shong shah thngan bad u nongïalam jong ka Foundation ka long ban ai jingkyrshan ïa ka jingdawa jong ka GTF bad ynda la kut ka 12 kynta kin ïa kylliang shuwa bad ki nongïalam jong ka WORD, namar ba ki don ki kam ba ka dang hap ban pyndep bad kaba ym lah ban kiar.
“Lada ka Sorkar ka dang kyllut bad ka Sorkar ka dang matlah ka Women Organisation of Ri Bhoi District kam banse ban shim da kiwei ki sienjam ka ban dei da ka jingïakhih shah thngan ba khlem buh por” la ong ka Kong Marsing.
Shuh-shuh ruh ka la ong ba ki nongïalam jong ka WORD ki long kiba kloi ban aiti na ka bynta ban ïada ïa ka khyndew ka shyiap kaba long ka lawei jong ki khun ki kti jong ka pateng ban wan, ka la kyntu jur ïa ka Sorkar ba kan da pyrkhat bha shuwa ba ki kynthei kin shim ïa ka rai ban wan shah thngan lang khamtam ba kin shim ïa ka rai ban shong shah thngan khlem buh por.
Ka la ong ruh ba, lada Sorkar ka dang ïai sngap mynthi, kam kwah ban pyndem, ban ïasuk bad ban ai ïa ka jingdawa jong ka Foundation, kan poi haduh u pud ba ki nongïalam jong ka WORD kin shah thngan khlem buh por, ban ïa kaba aiti ïa ka khyndew ka shyiap ha ki briew kiba nabar.
