Shillong, Ïaïong 16
Haduh khatsan ngut ki briew ki la shah kem ha kaba ïadei bad ka jingkynnoh donkti ban pynïap ïa uwei u briew ha shnong Dagal Nachikol kaba hap hapoh ka thanad Songsak ha East Garo Hills, ha kaba ki pulit mynta ki dang pynlong ruh ïa ka jingthwet kaba jur ban ïohkem sa ïa uwei uba dang phetrieh.
“Napdeng ki 16 ngut kiba la jer kyrteng ha ka ejahar, 15 ngut kila shah kem. Ka jingkhynra ki pulit ka dang ïaid shakhmat ban kem sa ïa uwei,” ong u Superintendent of Police ka East Garo Hills Bah S Rynjah ha ka kyrwoh.
Ïa kane ka jingkhynra bad kem la leh halor ka ejahar ba ïadei bad ka jingpynïap briew kaba la ïoh pdiang da ka thanad Songsak hadien jong ka jingjia kaba la jia ha ka 8 tarik Ïaïong 2026, ha kaba uwei u briew ba kyrteng u Talseng T Sangma ba na Dagal Nachikol, ula shah shoh ha ka kynhun ki briew ha la ka jong ka phyllaw ïing.
Une u rangbah u la mynsaw jur bad hadien u la khlad noh na ki jingmynsaw katba dang kit ïa u sha Civil Hospital, Williamnagar.
La ong ba kine ki briew kila leit rung beaiñ ha phyllaw ïing une u rangbah bad kila byrngem byrsit ïa ki bahaïing hasem ba kin leh da kaba tyngeh.
Ki Pulit ka East Garo Hills kila kyrpad ïa ki paidbah ba kin nym pynphriang ïa ki jingtip ba bakla bad ban nym pynsngap ïa ki khubor hamsaia namar kane ka jingjia ka dang don ha ka jingtohkit.
