Shillong, Ïaïong 16
Ha ka janmiet jong ka sngi Palei, kaba dei ka sngi ba phra ka jingshah thngan jong u Chairman ka Green Tech Foundation, kata u Bah H Bansiewdor Nonglang, ki bor district ka East Khasi Hills District ki la wanrah da ka jingthoh kaba la ai na ka Sorkar Jylla.
Ha kane ka shithi kaba ka GTF ka la ïoh pdiang na u Joint Secretary ka Sorkar Jylla lyngba ka tnad Tourism, kaba la wan poi ha madan Malki la ong ba kane ka project ha Lumpongdeng ka Sorkar kam don kano-kano ka jingthmu ban tei ïa ki jingtei kiba heh ha katei ka jaka.
Ha ka shithi ba la ïoh pdiang, ka Sorkar ka la kyrpad ïa u Chairman ka GTF ban sangeh noh ïa ka jingïakhih shong shah thngan ha madan Malki halor kane ka jingdawa.
Na ka liang U Chairman ka GTF haba kren hadien ba la ïohpdiang ïa kane ka shithi u la ong “Ka Sorkar kumba la jubab da u Myntri Rangbah ka Jylla u Conrad K Sangma bad kane ka shithi ka dei kumjuh, kaba ki ong ba kan ym don kano-kano ka jingthmu tei ïa ki jingtei ha dewlynnong Lumpongdeng”.
U la ong ba 60 snem ka Sorkar ka la ai wai sha ka kompeni heh spah ban tei ïa ki jingtei ha Lumpongdeng bad tang 10 snem ngi la klet halor kane ka mat bad kin sa sdang ban pynkhyllem ïa u Lumpongdeng, ha kaba u Chairman ka GTF um shym la hun halor kane ka shithi ba la ïoh pdiang.
“Ngin nym lehkai halor kane ka mat bad da lei-lei ruh ngan nym mih na ka jaka shong shah thngan tad haduh ba ka Sorkar kan ai da ka jingthoh ba ka la pynduh ïa ka soskular kaba la ïasoi bad ka Umïam Hotel Private Limited,” la ong u Bah HB.Nonglang.
U la ong ruh ba ka Sorkar ka dei ban pynphai noh ïa kane ka jaka kaba la ai wai sha ki kompeni ïa ka dewlynnong Lumpongdeng sha ki paidbah ka Jylla ban long trai biang, “Lada ka Sorkar ka ai ïakata ka jingdawa ngan sa sangeh noh ïa ka jingshah thngan.”
