Shillong, Iaïong 16
U Chairman ka Green Tech Foundation, u Bah H Bansiewdor Nonglang ha ka sngi Palei u la kyntait ban leit sha Hospital hadien ka jingkyrpat na ka liang ki bor district bad ki Magistrate, da kaba bteng ïa ka jingshah thngan khlem buh por ha madan Malki haduh ba ka Sorkar jylla kan wengnoh ïa ka project ha dewlynnong Pongdeng bad ban weng ïa ka FIR ba la ujor sha ki nongïalam ka kynhun.
“Ngi don ar tylli ki jingdawa, wengnoh ïa ka projeck ha Lumpongdeng, wengnoh ia ka FIR ba la mudui pyrshah ïa ngi, ngin leit mon sngewbha nangne sha hospital bad ngin leit ruh sha ïing,” la ong u Bah HB.Nonglang.
U la ong ruh ba lada phim lah ban ban leh kumta, nga kyrpad ïa ki bor synshar district ba kim dei ban rah jubor ïa nga sha hospital, nga dangsngewthuh ha ka bor pyrkhat.
U Bah HB.Nonglang u ong ba ka jingïakhih jong u ka long na ka bynta ka jinglong trai shnong ïa katei ka jaka ha Lumpongdeng.
“Naduh ka sngi ba nyngkong, nga khlem pynbor ïano ïano hynrei nga la shim rai ban pynthikna ba ki trai shnong ba kin dei ki trai kiba pura ïa katei ka dewlynnong Lumpongdeng,” u la ong.
“Kan bha ba ngan ïap ban ïa kaba ailad ïa ki briew kiba nabar ban shim ïa ka jinglong trai ïa ka dewlynnong Lumpongdeng,” u la bynrap.
Kane ka jingkren jong u ka la wan hadien ba ka Sorkar jylla ka la ban ba kan nym don kano kano ka jingtei kaba neh shirta ha ka dewlynnong Lumpongdeng bad ba ïa ka Taj Resort & Spa ban tei ha ka jaka jong ka Orchid Hotel ha Umïam.
