Shillong, Ïaïong 16
U Myntri Rangbah ka Jylla Conrad K Sangma u la pyntip ba ka surok 4-lane ka ban pynïasoh ïa ka Polo sha New Shillong bad sha ka Secretariat ba dang tei, ka la don ha ka kam bad bynrap ba ka jingïakren bad ki trai jaka lem bad ki kynhun ba don bynta, ka la jan dep bad kaba sah ka long tang katto katne ki mat kiba dei ban pyndep.
“Ki don bun tylli ki surok kiba la pyntrei katba ngi dang ïakren, kaba heh duh ka dei ka surok 4-lane ka ban sdang na CRPF Camp ha Polo tang mar ïa lait ka jingkieng bad ïaid lyngba katto katne ki jaka khlaw bad wat ka bynta jong ka Hima Mylliem Forest Reserve bad pynïasoh shaduh Maw-pat bad sha Secretariat ba thymmai,” u la ong.
U Myntri Rangbah u pyntip ba ki jingïakren kila ïaid shaid-shaid hapdeng ki agency bapher-bapher bad ki trai jaka shimet.
“Ngi la dep pynlong ïa ka jingïakren ba bunsien ha ka kyrdan jong ki agency bapher-bapher bad ruh ki riew shimet, la ka dei ki riew shimet kiba don jaka ha ka thaiñ, lane bad ka Hima Mylliem lane wat ka skul ki Pulit kaba don ha Golflink,” ong u Conrad.
U Conrad u pyntip ba ki kam kila ïaid shaid-shaid bad mynta kila don ha ka bynta ba khatduh.
“Ngi la jan dep ka jingïakren bad baroh kiba don bynta. Ki don 1-2 tylli kiba dang sah hynrei kim dei shuh ki jingeh kiba heh. Ngi la ïapoi sha ka jingïasngewthuh jingmut, ngi shu donkam ban shim rai tang ïa ki katto katne ki kam,” u la ong.
U Conrad u la ban ruh ba kane ka projek kan ïarap shibun ban pynbha bad kyntiew ïa ka leit ka wan sha New Shillong.
