Shillong, Ïaïong 16
U Myntri Rangbah ka Jylla Conrad K Sangma u la ïathuh ba ka Sorkar Jylla kala buddien ïa ka jingpynkylla jong ka Sorkar Pdeng halor ka kyndon 100 hectare ban tih dewïong ha Meghalaya, hynrei kat bym pat don jingkylla, kan pynïaid shakhmat bad ki jingthmu ban tih dewïong bala dep ai jingmynjur da ki bor ka Sorkar Pdeng.
“Ngi la kyrpad ïa ka Sorkar India ba kan pynkylla ïa kane ka kyndon 100 hectare,” ong u Conrad haba jubab ïa ka jingdawa ki nongtih dewïong ka Ri-lum Jaiñtia ïa ka Mining Policy kaba ïahap bad ka rukom long rukom man ki jaka jong ka thaiñ.
U Myntri Rangbah u la batai balei ba ka Jylla kala mynjur ban pynïaid beit shakhmat bad kane ka jingpynbeit ba mynta, ka daw hi ka long ba ha katei ka por haba buh ïa ka kyndon 100 hectare, ha ka jaka ban ïasaid bad pyrshang ban pynkylla ïa kine kiei kiei, u sngew ba ka long kaba donkam ban pynlait shuwa na ka jingshah khang bad ban sdang shuwa ïa ki kam tih dewïong bad ïoh katto katne ki licence.
U la ong ba ka bynta kaba ar bad ka sienjam ka long ban ïoh ban pynkylla ïa ka kyndon 100 hectare haba ka Sorkar kala shimkhia bha ban ïakren ïa kane ka kam sha New Delhi.
U Conrad u la pynpaw ïa ka jingkyrmen ban ïoh ïa ka jubab kaba sngewtynnad hynrei u la ong “Phi sngewthuh ba ka donkam ban leh bun ki kam, ban ïakren ha ki kyrdan bapher bapher ka Sorkar India bad ki jingïakynduh ïa ki ophisar bapher bapher, ban ïakynduh ïa u Myntri Rangbah duh ka ri ruh.”
“Ngi la leh ïa kane ka kam hynrei ka shimpor namar kam dei ka rai kaba suk, namar ka Sorkar India shisien ba ka pynjynsur ïa kawei ka Jylla, kiwei ki Jylla ruh kin sa dawa ïa ki kyndon ba kyrpang na ka bynta jong ki ruh,” u la ong.
Halor ka jingïatai halor ka Open Cast bad ka jingtih krem, u Conrad u la ong ba ka jingai jingmynjur ka shong ha ki agency ka Sorkar Pdeng.
“Ngam dei u engineer tih par kumta ngam lah ban kynthoh eiei halor kane ka bynta hynrei haba khmih ïa ka kam, baroh kiei kiei ki don ïa ka jingbha bad don ruh ïa ka jingktah,” u la ong.
