Shillong, Ïaïong 16
Ka Meghalaya State Pollution Control Board (MSPCB) kaba hap hapoh ka tnad Forest and Environment jong ka Sorkar Jylla, ka la phai khmat sha ka shnong Sohra ban pynlong ïa ka jingpynsngewthuh paidbah haba ïadei kumno ban pynneh pynsah ïa ka jingkhuid jingsuba jong ka sawdong sawkun namar ka Sohra ka dei ka shnong kaba la khring bha ïa ki nongwan jngohkai ba na kylleng ka pyrthei.
Ka MSPCB ka la pynlong ïa kane ka jingïalang ha ka sngi Palei ha ïingdorbar Shnong ka Sohra Civil Sub Division halor ka phang “Ka Sohra kaba khuid, ka Sohra kaba jyrngam: Ka jingkitkhlieh lang na ka bynta ka kam jngohkai pyrthei kaba neh” ha kaba na ka tnad MSPCB la wan ban ïashimbynta u Member Secretary u Dr. GH Chyrmang, MFS, u Bah S Syiem u Environmental Engineer, ka Kong C Pohrmen bad u Bah Mynjurlang Majaw Acting Chief jong ka Hima Sohra ha ryngkat kiwei-kiwei.
Haba ïoh ban ïakren ïa u Dr. GH Chyrmang u la ïathuh ba ka jingthmu jong kane ka jingïalang ka long ban ai ki jinghikai ïa ki nongshong shnong jong ka Hima Sohra bad ban ïoh ban ïakren ban ïasyllok ba kin ai ka jingïatrei lang bad ka tnad.
U la ong ba ka Sohra ka dei ka jaka kaba la khring bha ïa ki nongwan jngohkai pyrthei hynrei ki dang duna ki jingïada haba ïadei kumno ban pynlang ïa ki jaboh jabaiñ bad ki ñiut, namar kata ka long ba donkam ban pynsngewthuh ïa ki nongshnong shnong khnang ba kan ym buh jingeh hadien habud bad ba ka Sorkar kan lah ban wanrah ïa ki jingdonkam.
U la kdew ba ki plastik kidei kawei na kiba wanrah ïa ka jingjaboh ka mei mariang bad ki sawdong sawkun namar kata ka tnad ka kwah ban wanrah ïa kawei ka teknoloji ha kaba ïa ki plastik ba pyndonkam tang shisien yn lah ban pynthymmai bad ban pyndonkam biang.
U la pynpaw ba lada la lah ban buh ïa kine ki jingdonkam, thikna lah ban jop ïa ka jingeh kaba mih na ki plastik bad ba ka jingitynnad jong ka dong ka thaiñ Sohra kan neh kan sah, da kaba kyntu ruh ïa ki nongwan jngohkai ba nabar ba kin ai ka jingïatreilang bad ka Sorkar kumjuh ïa ki trai shnong.
