Khliehriat, Ïaïong 16
Ki runar ki bym lah ban ithuh ha ka step phyrngab jong ka 14 tarik Ïaïong ki la leit ban kyndang ïa kawei ka ATM jong ka HDFC kaba don ha ka shnong Wapungskur, East Jaiñtia Hills District bad ïoh ban rongtuh ïa ka pisa kaba kot T.9,57,900.
U Superintendent of Police ka District, u Pankaj Kumar Rasgania lyngba u kyrwoh u pyntip ba kane ka jingjia ka la jia ha ka por kumba 2:24 baje mynstep ha kaba lyngba ka CCTV la ïohi ruh ïa ki arngut ki nongtuh kiba dang khung ïa ka pisa na kane ka ATM.
Hadien kane ka jingjia ka kynhun Crime Scene ka la wan poi mardor ha kane ka jaka ha ka por 12:30 mynsngi ban pynlong ïa ka jingtohkit bniah, bad na ka liang ki pulit ki la pyndonkam da ki ksew sma dien ban lapksai ha kaba ïadei bad kane ka jingjia.
U SP u pyntip ruh ba kine ki runar ki la pyndonkam da ka ‘gas cylinder’ bad kiwei pat ki tiar ban ot ïa ka ATM Machine ïa kaba ki la iehnoh ha kane ka jaka hadien ba ki la phet krad.
Nalorkata u pyntip ruh ba kine ki runar ki la rongtuh ruh ïa kawei ka kali Bolero pickup ban leit sha katei ka jaka ïa kaba ki la iehnoh bad phet krad da ka kjat.
“Haduh mynta hi ym pat shym la lapksai ïa kiba suba donkti bad ïa ka leit ka wan jong ki,” ong u SP haba bynrap ba ka kynhun ki pulit ka dang pynkhreh ïa ka kaiphod na ka bynta ka ïingkashari High Court bad Judicial Commission.
