Shillong, Ïaïong 16
Ka jingther jong u phria ba jur ha ka janmiet jong ka 15 tarik mynta u bnai, ka la wanrah ïa ka jingjulor jong ki spah tylli ki ïingsop tin, kiba la pei thliew, kaba la jia ha ka shnong Umshaken kaba hap ha ka Umling C&RD Block ha Ri Bhoi District.
Ha kaba ïadei bad kane ka jingjia shah lynshop mariang jong ki spah tylli ki ïing, na ka liang jong u Rangbah Shnong ka Shnong Umshaken u Bah Evaneser Shylla u la pynthikna ba ka la don ka jingther slap bad phria kaba jur bha ha katei ka janmiet ha kaba palat 100 tylli ki longïing ba tap da ka tin hapoh ka shnong ki la shah ktah bad pei thliew na ka jingther u phria.
Shuh-shuh u la ong ba kane ka jinghap phria kaba jur ka la ktah bun bha ïa ki nongshong shnong namar ka jingjot jingpei ki tin bad jaw um ha ka por ba slap, ha kajuh ka por u la kyntu ruh ïa ka Sorkar ban pynkloi ïa ki lad jingïarap sha ki nongshnong shnong namar kane ka por ka la dei artad ka aïom slap.
