Shillong, Ïaïong 16
Ka Kmie jong u Kennedy Khongsit, 32 snem ka rta, ka la ïathuh ba ka la don jingtip ba u Kennedy u la sah lang bad kawei ka kynthei, kaba la tip ba dei ka Kong Eilang Phawa.
Haba kren sha ki lad pathai khubor ha ka 16 tarik u Ïaïong 2026, ka Kmie ka la jaw ki ummat bad sah ha ka umdum halor ka jingleh jong u Kennedy ban shim ïa ka jingim jong ka Kong Eilang Phawa.
Namarkata, ka la panmap sha ki bahaïing hasem jong u heprit Kyrshanbor Kharmudai bad sha ki bahaïing hasem jong ka Kong Eilang Phawa halor ka jingshim u Kennedy ïa ka jingim jong ki baroh ar ngut.
“Nga la sneng la kraw bha ïa u ban ïaid ha ka lynti kaba dei hynrei um shym la sngap bad ïaid ha la ka jong ka mon,” la ong ka Kmie.
Haba kylli, ka Kmie ka la ïoh jingtip ba u Kennedy u thiah bad sah lang bad kawei ka kynthei ha kawei ka ïingjah kaba ym don ba sah briew la slem, da kaba bynrap ruh ba ha jaka ba kan leit sneng ka isih noh ïa la u khun namar ba um ju sngap ïa kaei kaba ka sneng ka kraw man ka por. ” Ngam tip ba haduh kat une u pud ba un leh ïa kane ka kam ban shim syndon ïa ka jingim jong ka Kong Eilang Phawa.”
“Nga pait ka mynsiem bad nga sngew synei palat ïa ka longïing jong ka Kong Eilang Phawa bad kumjuh ruh sha ka longïing u heprit halor ka jingleh jong u Kennedy,” la bynrap ka Kmie.
Ka la ong ruh ba u Kennedy u don ïa ka jingshit khlieh kaba ym long ban pynthud ne mai ïa u. “Ha ïing hasem u ju pyni ïa ka jingdom hynrei ban ktah kti ïa nga ka Kmie pat um ju nud bad u shu kren dom bad mih beit bran bran na la ïing.”
Nalorkata, ka la ban shuh-shuh ba ha ka por ba u Kennedy u wan ban kylliang jaiñ ha ïing bad wan lang bad ka Kong Eilang kam shym la ïoh kylli ba u la sah la katno sngi bad kane ka kynthei namar ba ka isih ïa la u jong u khun bad kam kwah hi ruh tang ban kren ïa u. “Mar shu dep ban kylliang jaiñ u Kenedy u la mih noh na ïing ryngkat bad ka kynthei ba u wan ïalam bad ngam shym la ïoh jingtip shano u leit,” ka la ong.
