Shillong, Ïaïong 16
Ki nongïalam ba hakhmat jong ka Khasi Students’ Union sengkmie kata u samla Lambokstarwell Marngar uba bat kum u President bad u samla Donald Thabah kum u General Secretary ki la shongthait noh namar kim shym la ïakhun shuh ïa kane ka shuki haba la wan ka jingpynthymmai ki shuki ba la bate ha ka samoi treikam kaba thymmai jong u snem 2026-29.
Katkum ka kyrwoh khubor ba la phah da ka Election Committee ba la soi da u Bah Danny Khyriem kum u Chairman bad Bah Samuel B Jyrwa kum u Secretary ba la jied da ka Central Executive Council (CEC) jong ka Khasi Students’ Union (KSU), ban pynïaid ïa ka ilekshon kaba khadhynriew (16) sha ka ophis treikam jong ka KSU CEC na ka bynta ka samoi treikam 2026-2029, bad ïa kane ka ilekshon la rai ban pynlong ha ka 09 tarik u Jymmang 2026 ha Dinam Hall, Jaiaw, Shillong naduh ka por 7 baje mynstep haduh 3 baje nohphai sngi.
Ka Election Committee ha ka 15 tarik u Ïaiong 2026 ka la dep ban bishar lut ïa baroh ki kot ki sla jong ki 38 ngut ki kyrtong ki ban ïa shim bynta ha ka ilekshon kaba khadhynriew jong ka KSU CEC bad kine harum ki long ki kyrteng jong ki kyrtong kiba la lah ban ïa shim bynta ha katei ka ilekshon:
Namar bym ïakhun shuh u samla Lambokstarwell ka shuki President ka la leit suk sha u Raymond Kharjana, ka shuki Vice-President la jop suk sha u Pynkmenlang Sanmiet bad ïa ka shuki General Secretary la jop suk da u Reuben Anderson Najiar namar kine lai ngut ym don ba ïakhun pyrshah.
Kumban shu pynkynmaw u samla Lambokstarwell Marngar bad u samla Donald V Thabah ki la shimti kum ki nongïalam ba hakhmat ka KSU ka dei ha u snem 2017.
Katba ïa kine ki shuki harum ki long, Assistant General Secretary ki don ar ngut ban ïakhun kata u Melajied Khongbuh bad Pynshaiborlang Rani.
Kum u Organising Secretary ki don saw ngut kata u Cleenstar Shabong, Samuel Shabong, Hopefulborn L. Mawnai, Nangrikupar Malngiang.
Kum u Education Secretary ki don san ngut ban ïakhun kata u Alerick Kharjana, Nangshngainbha Lakiang, Andrew Gary Dkhar, Robinnestar Nongrem, Samuel L. Nonglait.
Kum u Information & Publicity Secretary ki don san ngut ban ïakhun kata Pynshai Kupar Dkhar, Shelkitbok Kharbani, Jeremaiah Pohthmi, Sandy Sohtun, Michael Mawa.
Kum u Office Secretary ki don hynñiew ngut kata u Wanmi-Shai-I Khongjoh, Gary R. Mawlieh, Dennyson Nongpluh, Mankhrawbok Marbaniang, Edmund Marboh, Wallamkupar Majaw, Pynshngainlang L. Lyngkhoi.
Kum u Sports & Cultural Secretary ki don saw ngut ki ban ïakhun kata u Eric Anthony Nongkynrih, Kevin Nelson Wanrap, Gerald Ford Langstieh, Badonbok Malngiang.
Kum u Environment Secretary ki don phra ngut kata u Kevin Phrangsngi Nongkynrih, Samuel Kharbani, Shiningstar Kharbihkhiew, Welborn Nonglang, Bankerlang Mukhim, Badonkupar Kharmalki, Pynbiangbor Kharsyntiew, Basuklang N. Khongwar.
