Shillong, Ïaïong 17
Ka Meghalaya Asha Worker Union ha ka sngi Thohdieng ka la pynlong ïa ka jingïalang paidbah ban ïakren ïa ki kam ka Union ha kajuh ka por ban pynthymmai ruh ïa ki nongïalam ba hakhmat jong ka Union.
Ha kane ka sngi ki hajar ngut ki nongtrei Asha ba na kylleng ka Ri Khasi-Jaiñtia bad Garo ki la wan ban ïashim bynta ha ka jingïalang kaba la long ha madan Student Jaïaw kaba long ruh ka jingïalang kaba jop.
Kane ka jingjied ïa ki nongïalam ba thymmai jong ka Union ka long na ka bynta lai snem ha kaba ïa ka kam President ka Kong Mira June Marsing ka la jop na ka jingïoh ïa kiba kyrshan 1,578 ngut, ïa ka kam Secretary ka Kong Wanshailud Wahlang ka la jop na ka jingïoh ïa kiba kyrshan 1,121 ngut bad ïa ka kam Treasurer ka Kong Fiona Tmung ka la jop na ka jingïoh ïa kiba kyrshan 1,183 ngut.
Haba ïoh ban ïakren ïa ka President ba thymmai ka Union ka la ïathuh ba ka thong ba hakhmat eh jong ka, ka long ban trei na ka bynta ka Union khamtam haba ïadei ban ïoh jingïarap na ka Sorkar ban tei ïa ka ophis treikam ba pura jong ka Union bad haba ïadei ka jingsiew ba ki Asha ki ïoh shisien shibnai ba ka Sorkar kan pynkiew.
Ha ka jingïakynduh lang ka Union la wan ban ïashimbynta lang u Chairman ka Khasi Hills Autonomous District Council u Bah Strong P Kharjana, u MDC ka Umroi Constituency u Bah Isynei Hinge, u Bah Plielad Tiewsoh Advisers ka Ri-Bhoi District Asha Association, u Bah Kyrmen Uriah kum u Chairman ka Sur u Paidbah ka Bri U Hynñiewtrep ha ryngkat u Bah Fairson Kharjana Election Ophisar jong ka MAWU bad ka Kong Soni Kharjana Advisers MAWU.
