Shillong, Ïaïong 17
Ki doktor ha ka janmiet jong ka sngi Thohdieng ka 17 tarik u Ïaïong 2026, ki la rah noh ïa u Chairman ka Green Tech Foundation (GTF), u Bah H Bansiewdor Nonglang sha Civil Hospital ban ai ka jingsumar.
Kane ka jingkit ki doktor ïa u Chairman ka GTF ka wan hadien ba ki la dep ban peitbniah shuwa ïa ka koit ka khiah jong u ha madan Malki, da kaba pynthikna ba um long shngaiñ shuh lada bteng ïa ka jingshah thngan.
Ka jingshah thngan jong u Chairman ka GTF ka la poi sha ka 9 sngi lynter ha madan Malki.
Ha shuwa kane, na ka liang ki nongïalam ka Foundation ki la kyrpad ryngkat ka jingjaw ummat ïa u Chairman ba u dei ban leit noh sha Hospital namar ka koit ka khiah jong u kam long shngaiñ shuh.
Hadien ka jingkyrpad jong ki nongïalam, u Bah HB Nonglang u la mynjur ban leit sha Hospital ha ryngkat ka jingjaw ummat ha kaba u la pynsngew ba ka jingïakhih kan nang ïai bteng bad ba kim pat pyndem ha ka Sorkar.
U Bah HB.Nonglang u la sdang ïa ka jingïakhih shong shah thngan ba khlem buh por ha madan Malki ha ka 8 tarik u Ïaïong 2026, ban dawa ïa ka Sorkar ban weng noh ïa ka projek ha dewlynnong Lumpongdeng.
Haba poi ha Hospital bad shuwa ban rung shapoh u Bah HB.Nonglang u la ong “Wat khuslai namar jong nga dei ban khuslai na ka bynta ka Lumpongdeng. Lada ngim lah ban ïoh biang ïa ka Lumpongdeng kan dei ka jingrem jong ka jaitbynriew, lada ngi jop ngin long trai biang ïa ka Umiam bad Lumpongdeng”.
U la ong ba kum u nongïalam u la ïaleh katba lah hynrei ki nongïalam bad ki paidbah kim shah shuh ïa u ban shong shah thngan ha Malki.
U Bah HB.Nonglang u ong “Nga tharai phim kwah ba ka jingïap jong nga kan dei ka jubab ïa ki mynder bad ki myndie ri ha Secretariat. Phi kwah ba ka jingjop jong ngi kan dei hi ka jubab”.
Namarkata, u Bah HB.Nonglang u la ong ba ki paidbah kin pynjur ïa ka jingduwai bad leh ïa kaba donkam, bad ban pyndap ïa ka madan Malki.