Shillong, Ïaïong 17
Hadien ba la pynkit noh ïa u Chairman ka Green-Tech Foundation (GTF), u Bah H Bansiewdor Nonglang sha Civil Hospital Shillong ban phah sumar, na ka liang u Secretary General, u Bah Ritre Lyngdoh u la pynbna ba un sdang sa ma u ïa ka jingshah thngan khlem pud sngi ha Madan Malki.
Kane ka jingshim rai jong u Secretary General ka dei hadien ba u Chairman u la jur palat ka jingshitom ha ka met halor ka jingshah thngan khlem buh por ha madan Malki kaba la kot la 9 sngi lynter.
Haba kren sha ki lad pathai khubor u Bah Ritre ula ong ba kane ka rai ba un sdang ïa ka jingshah thngan ka dei ban bujli ïa u Chairman namar mynta u dang don hapdeng ka jingpeit ki doktor ha Civil Hospital.
U Bah Ritre u la ïathuh ba hadien 9 sngi jong ka jingshah thngan khlem pud sngi, ka koit ka khiah jong u Chairman, kam long shuh kaba shngaiñ bad dei namar kane, ki nongïalam bad ki nongkyrshan ka GTF da ka jingsngewkhia, ki la rai ban rah noh ïa u Chairman sha Civil Hospital Shillong.
“Kum u Secretary General jong ka GTF nga la shim ïa ka rai watla nga tip ïa ka jingktah jong ka rai jong nga ba ngan bteng ïa kane ka jingïakhih da kaba shah thngan khlem pud sngi naduh mynta ka janmiet tad haduh ba ka Sorkar kan wan ryngkat bad ka jubab sha ngi ban ong ba ka la pynduh pyndam noh ïa ka projek jong ka tnad Tourism ha dewlynnong Lumpongdeng” la ong u Bah Ritre.
Haba jubab halor ka jingkular u Myntri Rangbah ban pynshisha halor ka Project ha Lumpongdeng, u Secretary General ka GTF ula ong “U Myntri Rangbah u long u nongaiktien ïa ka jingong, nga kular ïa phi, ngan pynthikna ïa phi hynrei kam ju don eiei kaba thikna shaphang kano-kano kaba u kular”.
U Bah Ritre u la ïathuh ba ka GTF ka la ïoh ïa ka shithi na ka Joint Secretary ka tnad Tourism ka Sorkar Jylla ha kaba ki la pynshai, ba kan ym don kano-kano ka jingtei ha dewlynnong Lumpongdeng.
“Hynrei ngi kwah ban buh jingkylli, lada ym don jingtei, kumno la ai wai (Lease) jaka bad ka Umiam Hotels Private Limited ka ban neh palat 60 snem” u la ong.
“Kam don jingmut bad ka long kaba ibiej ba ka Sorkar kan aiti ïa ka jaka khlem kano-kano ka jingthmu, ka Sorkar ka hap ban pynshai namar kane ka mat kam dei shuh tang ka mat jong ka GTF, hynrei ka dei ka mat jong ka imlang sahlang jong ka Jylla Meghalaya baroh kawei” la bynrap biang u Bah Ritre.
U Secretary ka GTF, u la ong ba ka Forum ka kloi ban wan sha ka miej ïakren hynrei ka Sorkar ka dei ban ai da ka jingthoh.
