Shillong, Ïaïong 17
Ka Greta Solution Training Academy ka la pynlong ïa ka jingsam syrnod sha ki 190 ngut ki samla shynrang bad kynthei kiba la pyndep ïa ki jait jingpyntbit bapher-bapher ba ka Academy ka ai.
Ka Greta Solution Training Academy ka ai ki jingpyntbit ba ym donkam siew kum ha ka Beauty Wellness and Spa Thearapy, Street Food Vendors bad Craft Bakery ha kaba kiba bun ki samla ki la ïoh jingpyntbit bad ïoh kam ha kylleng ki jaka jong ka ri India.
Ïa kine ki samla la pynkup burom ha City Hot Dhaba ha kaba la wan ban long kongsan da ka Assistant Commissioner ka East Khasi Hills District ka C Marak ha ka jingïadonlang ka Kong P Nongkhlaw ba la mihkhmat na ka tnad Meghalaya State Skills Development Society (MSSDS).
Haba ïakren sha ki nongthoh khubor u Placement Co-ordinator ka Academy u Bah Federrick Embhah Shanpru u la ong ba kine ki samla kiba la ïoh jinghikai ha ka kam, ki wan shah hikai ha ka jinghikai kaba long lai bnai bad kim donkam siew eiei namar ïa kane ka projek la bei tyngka da ka MSSDS.
Shuh-shuh u la ïathuh ba na ki 190 ngut kiba la pyndep ïa kane ka jingshah hikai kumba laiphew ngut tam eiei ki la ïoh kam ha ki Taj Gateway Bekal ha Kerala ha ki Hotels Marriott, ki Radisson bad ki don ruh ki samla kiba la lah ban seng ki kam lajong.
Haba ïakren na ka samla kaba pyndep ïa kane ka jingshah hikai, ka samla Kidabet Kharmujai ka la ïathuh ba kane ka jingshah hikai ka long kaba myntoi shibun ïa ki samla ban ïoh kam ïoh jam khamtam kane ka jingai jinghikai ka long kaba khlem donkam siew.
