Shillong, Ïaïong 17
U President ka Hill State People’s Democratic Party (HSPDP), Bah K.P. Pangniang ha ka Sngi Thohdieng u la ong ba ka kylla kaba ar jong ka jingïakren pynbeit pud hapdeng ka Meghalaya bad Assam na ka bynta ki 6 tylli ki jaka ba dang sah kan sdang biang hadien ka ilekshon sha ka Ïingdorbar Thawaiñ jong ka Assam.
“Dang shen, u Myntri Rangbah ka Jylla u la ong sha ngi ba ynda la kut ka ilekshon ha Assam, kin sa sdang biang ïa ka jingïakren pynbeit pud”, ong u Bah Pangniang haba kren sha ki nongthoh khubor. U la ong ba ka seng ka la aiti ïa ka jingpynkynmaw sha ka Sorkar ha u snem ba la dep ban bteng ïa ka jingïakren.
“Ha u snem ba la dep, ngi la aiti ïa ka jingpynkynmaw na ka seng sha ka Sorkar ban bteng biang ïa ka kylla kaba ar jong ka jingïakren pynbeit pud bad ka Assam,” u la ong. U Bah Pangniang u la bynrap ba ka HSPDP kan sa ïakynduh biang ïa u Myntri Rangbah ka Jylla ha kine ki sngi ban wan ban pynbor na bynta ban ïaid shakhmat bad ki jingïakren.
“Hapoh kine ki khyndiat sngi, sa shisien biang, ka seng ka la rai ban ïakynduh ïa u Myntri Rangbah ka Jylla ban sdang biang ïa ka jingïakren na ka bynta ki 6 tylli ki jaka kiba hapdeng ka jing-ïa-ka-jia – kiba dang sah, ban pynbeit noh ïa u pud u sam uba la sahteng la bun snem hapdeng ka Jylla bad ka Assam,” u la ong.
Katkum ka jingong jong u, ka jingpynbeit ïa u pud u sam hapdeng ka Meghalaya bad ka Assam ka ïai long ka mat kaba hakhmat eh jong ka seng bad kan long sa “uwei pat u mawmer” na bynta ka Sorkar Jylla ban ïaid shakhmat.
