Shillong, Ïaïong 17
Ka All Khasi Meghalaya Tourist Taxi Association (AKMTTA) ka la ther tyngeh ïa ka Sorkar da kaba ong “Ka Sorkar Jylla ka dei jong ki bar jylla ym shuh jong ki trai ri trai muluk”.
Ka AKMTTA ka la ong ïa kane ha ka jingwan ai ka jingkyrshan ïa u Chairman ka GTF uba la shongshah thngan khlem buh por ha madan Malki halor ka jingdawa weng noh ïa ka projek ha Lumpongdeng.
Haba kren sha ki lad pathai khubor, u Bah Ricaldinus Dohling, President, u la ong ba ha ka jingkren jong u Myntri Rangbah ka Jylla, u kwah ban pynkhlaiñ ïa ki Homestay, ka Transport nalor kiwei-kiwei hynrei haduh mynta ka Sorkar kam pat lah ban khang ïa ki kali kiba wan nabar jylla ban kamai sha kane ka Jylla.
“Ngi ïohi ba u Myntri Rangbah ka Jylla um shym la patiaw eiei halor kane ka jingdawa ka GTF bad u la pynrem pynban ïa ka jingdawa ka kynhun,” u la ong.
U la ong ruh ba haba kiba don ha ka bor ki la kam ba kidei kiba peit ïa ki nongshong shnong ka Jylla, balei pat ki samla ka GTF ki dangwan ban shah thngan ha madan Malki. “Lada phi dei shisha ki nongsynshar ïa ka Jylla, leh keiñ ïa kaei kaba ki paidbah ki kwah.”
