Shillong, Ïaïong 17
Ki MDC ka Voice of the People Party kin sa leit ban ïakynduh ïa u Chief Executive Member ka Jaiñtia Hills Autono-mous District Council Bah Thombor Shiwat ban buddien namar ka jingbym pat ïoh ka tulop.
Haba ïakren bad u Bah Andrew Shullai uba dei u nongïalam Liang Pyrshah u la ïathuh ba ki MDC ka Liang Pyrshah ki la pynbeit ban leit ïakynduh ïa u Bah Thombor mynta ka sngi Thohdieng hynrei la pynsangeh noh namar u don jingïalang ha Shillong.
U la ïathuh ba ki MDC Liang Pyrshah kin sa leit ïakynduh ïa u Bah Thombor la shem taïew ban buddien ïa ka jingslem ban ïoh tulop ki nongtrei ka JHADC.
U la ïathuh ba haduh mynta ka Sorkar Jylla kam shym pat phah ïa ka tulop sha ki nongtrei ka JHADC.
U Bah Andrew u la pyntip ruh ba ka Sorkar ka dang pyllait khatduh ïa ka tulop ki nongtrei hashwa ka Khristmas mynshem snem.
Shuh shuh u la ïathuh ba ka Sorkar ka la pyllait ïa ka pisa ka dei hadien ba ki MDC ka Liang Pyrshah ki la pynlong ka jingïakhih.
U la ïathuh biang ba ka tulop kaba sahkut haduh mynta ka long kumba hynñiew bnai eiei.
Kumta u la ong ban kylli balei ka slem ban pyllait ïa ka tulop ki MDC ka VPP kin hap ban leit ïakynduh markhmat bad u CEM ban ïashai.
