Shillong, Ïaïong 17
Ka Voice of the People Party (VPP) ha ka Sngi Thohdieng ka la pynpaw ïa ka jingsngewkhia kaba jur halor ka rai (ba ka kynnoh) jong ka Bharatiya Janata Party (BJP) ban wanrah ïa ki kam pynroi ha krem Mawjymbuiñ lyngba ki skhim ka Sorkar Pdeng kum ka ‘PRASHAD’ bad ka ‘Swadesh Darshan’ 2.0, ha ryngkat ki jingkdew ba ïa katei ka jaka lah ban kyntiew kum ka jaka mane niam.
“Ka VPP ka kwah ban pynpaw shai ba ka krem Mawjymbuiñ ha Mawsynram ka dei tang ka jaka jngohkai pyrthei bad ka dei ban long kumta. Kano-kano ka jingpyrshang ban pynpaw, ban batai, ne ban pynroi ïa ka krem kum ka jaka mane niam ne wat ha ka liang ka kolshor ka long kaba sngewkhia shi kat dei bad ka bym lah ban pdiang,” ong u nongaiktien ka VPP, Dr. A.W. Rani ha ka kyrwoh.
U Dr. Rani u la pynkynmaw ba ka mat ban pynïasoh ïa ka Krem Mawjymbuiñ bad kano-kano ka niam ka la dep ban ïalam sha ka jingïatai paidbah bad ka jingtuklar jong ka aiñ ha ki por ba la leit.
Ki jingjia kiba mih na kiba kum kine ki pynshai ba ym dei ban pynkylla ne kheiñ ïa katei ka jaka kum ka jaka mane la ka long ha kano-kano ka rukom.
“Ha kum kane ka khyllipmat, ka VPP ka kyntu ïa baroh ki bor ba dei khmih bad ki nongshim bynta ban don ka jingkitkhlieh. Ngi dei ban burom ïa ka jingsngew jong ki paidbah bad ban kiar na kiei-kiei ki bym donkam kiba lah ban wanrah ïa ka jingïapait-ïapra bad ka jingbym shong suk,” u la ong haba ban biang ba ym dei ban pynïasoh ïa ka Krem Mawjymbuiñ bad kano-kano ka niam ne jingngeit la ka long ha kano-kano ka bynta.
“Ka long, bad ka dei ban ïai long, ka jaka jngohkai pyrthei,” la bynrap shuh-shuh u Dr. Rani.
