Nongpoh, Ïaïong 17
Hadien ka jingujor jong ka Hima Sohïong sha ka National Human Rights Commission (NHRC) halor ka jingshah shoh dusmon jong u Bah Noreshor Timung lem bad kawei ka longkmie ha ki nongtrei ka Assam Forest myn ha ka 30 tarik u Naitung, 2025 ha ka shnong Amreng kaba don ha khappud jong ka Ri-Bhoi bad Assam, ka NHRC ka la hukum ïa ki bor distrik ka Ri-Bhoi ba ki dei ban pynlong ïa ka jingtohkit bad ban pyndep hapoh saw taïew, kata kumba shi bnai eiei.
Halor katei ka jingbthah ka NHRC, u Sub-Divisional Officer ka Patharkhmah Sub-Division, u Chaitanya Awasthi ha ka Sngi Thohdieng u la khot hajir ïa ki nongïalam jong ka Hima Sohïong, kaba la wan ban mihkhmat da u Bah Rastingwel Thabah, Chairman, u Bah P.L. Thabah, Lyngdoh bad la wan ban synran lang bad kiwei ki nongsynshar ka Hima Sohïong.
Haba kren sha ki lad pathai khubor hadien katei ka jingshah khot ha u SDO ka Patharkhmah, u Bah Rastingwel Thabah u la ïathuh ba ka Hima Sohïong ka pynpaw ïa ka jingsngewkhia jur halor ka jingshah ban beiñ jong ki nongshong shnong ha ki thaiñ khappud ha ki bor Sorkar jong ka Jylla Assam bad pyntip ba kawei na kitei ki jingjia ka dei ka jingshah shoh jong ki 2 ngut ki nongshong shnong ka Amreng, kaba u Bah Rastingwell Thabah u la kam ba ka hap hapoh ka jingkhmih jong ka shnat Hima Nongwah Mawtamur, hapoh ka jingkhmih jong ka Hima Sohïong.
U Bah Rastingwell u la ong ba katei ka jingleh jong ki briew Sorkar pyrshah ïa ki briew jong ka Hima Sohïong, ban ñiew ïa ki ym shuh kum ki briew, hynrei la kum ki mrad ki mreng, ka la pyrshah ïa ka aiñ jong ka hok longbriew-manbriew bad pyntip ruh ba ka dei banyngkong ba ka Hima Sohïong ka la leit ban ujor ïa kane ka kam shaduh ka NHRC sha nongbah Delhi, kaba la shimkhia bad pynngat mukotduma pyrshah ïa ka tnad Forest ka Jylla Assam.
U la ïathuh ruh ba na ka liang ka Hima ka la kyntu ïa u SDO ka Patharkhmah ba u dei ban shim lut ïa ki sakhi-sabut ba kynthup naduh ki dur-khih, ki slip dawai bad kiwei-kiwei ki sakhi-sabut ban pynkhlaiñ ïa katei ka jingujor ka Hima Sohïong pyrshah ïa ka jingleh ka tnad Assam Forest, ha kaba na ka liang utei u ophisar ruh u la kular ban shimkhia khnang ba kitei ki nongshong shnong ha ki shnong khappud kin shong suk shong shngaiñ hadien-habud.
Shuh shuh na ka liang utei u rangbah, u la ong ruh ba kane ka jingleh jong ka Hima Sohïong ban ujor sha ka NHRC ka long kum ka nuska ïa kiwei pat ki Hima ne ki Raid, naba kam don jingmut satia ban ujor sha ki bor Sorkar Jylla kumba la leh halor ka jingïap jong ki briew ka Jylla-Mukroh, kaba ym shym la poi shaei-shaei ruh bad pynpaw ba ka Hima Sohïong kan ym ai lad wat shi inshi ruh ka jaka ban leit sha Assam da kaba kam trai ba ka Hima ka don ïa kot ki sla kiba biang ban pynshisha ïa kata.
Na ka liang u Bah P.L. Thabah, Lyngdoh ka Hima Sohïong u la pynpaw ba Hima ka sngewkhia ban tip ba ki khun ki hajar ka Hima ki la shah lehbeiñ ha kiwei pat ki briew ba nabar kaba la pynlong ïa ki ban ujor syndon sha ka NHRC na ka bynta ban ïoh ïa ka jingbishar kaba hok naba ka aiñ ka don la ki dei ki duk ki rangli ne kino-kino ki jingjia bad pyntip ruh ba na ka liang utei u heh ophisar u la kular ruh ban pynlong ïa ka jingleit jurip sha katei ka shnong Amreng ha kine ki sngi ki ban sa wan, ha kaba na ka liang ki nongsynshar jong ka Hima ruh kin ïadon ryngkat lang.
