Shillong, Ïaïong 18
Ka ‘Bill’ ban wanrah jingkylla ha ka ‘Women’s Reservation Bill’ kam shym la lah ban seisoh ne shah rem noh hadien ba ka Sorkar Pdeng kam shym la lah ban ïoh ïa ki ‘vote’ kiba donkam na ka bynta ban mynjur ïa ka ha Lok Sabha ha ka Sngi Thohdieng.
Ka Sorkar Pdeng ka la donkam ïa ka jingbun paid kaba ar na ka lai bynta ban ïoh ïa ka jingmynjur haba ïadei bad ka Constitution (131st Amendment) Bill, 2026, hynrei kane kam shym la seisoh.
Kane ka aiñ ba la tyrwa ka la sakhi ïa 298 ngut ki MP kiba la kyrshan ïa ka katba 230 ngut kiwei pat ki la pyrshah.
Ki 2r tylli kiwei pat ki ‘Bill’, kynthup ïa kawei ba ïadei bad ka jingpynbeit pud bad ban pynbun ïa ki ‘seat’ ha ka Lok Sabha, kim shym la leit sha ka jingthep ‘vote’ hadien ba ka banyngkong ka la pulom – ha kaba ka Sorkar Pdeng ka la ong ba ki don “ka jingïadei kaba ïajan” bad ka aiñ kaba ïadei bad ka jingbhah kyrpang ïa ki kynthei.
Ka jingïatai hapoh Lok Sabha, kaba la ïaid haduh ka shiteng synñia jong ka Sngi Palei bad kaba la bteng ha ka Sngi Thohdieng, ka la sakhi ïa ka Sorkar Pdeng, ba ka la sei ïa ki nia ki jutang kiba ban jur na ka bynta ban bhah kyrpang ïa 33% ki ‘seat’ ha Lok Sabha, bad ki Ïingdorbar Thawaiñ jong ki Jylla.
Haba lamkhmat na ka bynta ka Sorkar, u Myntri Rangbahduh ka ri, u Narendra Modi u la pyrshang ban tem ïa ka jingtieng jong ki seng ka Liang Pyrshah bad u la ong ba u ai ka jingkular hi dalade ba kan ym don kano-kano ka jingleh bym hok ïa ki Jylla ka thaiñ Shathie da ka jingpynkiew ïa ki ‘seat’ ha Lok Sabha.
“To ngin ym pynleh nohei ïa kane ka kabu kaba kongsan ban ai ka bhah kyrpang ïa ki kynthei. Nga wan ban kyrpad ïa phi – wat peit ïa kane na ka jingpeit jong ka saiñ pyrthei, kane ka dei na ka bynta ka jingmyntoi jong ka ri,” la ong u Modi.
Na ka liang u Myntri kam pohïing ka Sorkar Pdeng, u Amit Shah u la pyntikna ïa ka Ïingdorbar ha baroh ar sngi ba yn pynneh-pynsah ïa ka jingmihkhmat jong ki Jylla ba Shathie, lane kan kiew khyndiat, ynda la pynkiew ïa ki ‘seat’ ha ka Lok Sabha na kaba don mynta – 543 sha kumba 816 eiei.
Shuh shuh u Modi bad u Shah ki la kynthoh ïa ka Congress bad kiwei-kiwei ki seng ka Liang Pyrshah ba ki pynmih ïa ki mat ha ban pyrshah ïa kane ka ‘Bill’ bad ban pynduh ïa ki kynthei ïa ka bhah.
