Shillong, Ïaïong 17
Ka Voice of the People Party (VPP) West Khasi Hills District ka la poi ha ka jaka shong shah thngan u Chairman ka Green Tech Foundation, u Bah H.Bansiewdor Nonglang ha madan Malki, kaba u shongshah thngan khlem buh por ban dawa ïa ka Sorkar ban wengnoh ïa ka projek ha dewlynnong Lumpongdeng.
Haba kren sha ki lad pathai khubor, ki nongïalam ka VPP ki la pynpaw ka jingbynniaw halor ka jingsngap kuman ka Sorkar Jylla ïa ka jingdawa ka Foundation bad kumta ki la dawa ba ka dei ban pynduh noh ïa ka jingthmu kaba ka don ha ka Lumpongdeng.
Ki la ong ruh ba kam lei-lei lada dei na kano-kano ka kynhun, hynrei dei ban don ka jingïatylli haba ka jingdawa ka dei kaba don nongrim.
“Ka Sorkar ka la shu leh donbor bad thom da ka bor ïa ka jingsngew jong ngi ki paidbah. Wat pyn-ing ïa ka mynsiem jong ngi ki nongshong shnong ïoh kan sa pluh namar ngi la tip shai halor kane ka jingdawa ka GTF bad ka dei kaba shong nongrim,” la ong ki nongïalam.
Shuh shuh ki la ong ba kam myntoi ïa ka Sorkar ba kan ai daw da kumne kumtai hynrei ka suk ba kan shu pyndem noh, wengnoh halor ka jingai wai ïa ka projek sha ki kompani heh spah, khnang ba ka shongsuk shongshngaiñ kan don hapoh ka Jylla.
Da kaba maham ruh ïa ka Sorkar ba lada ka leh ïa kaba dei ban leh dei ban leh noh, lym kumta ma ki paidbah kin nym lah ban shu peitsah ïa u Samla ba shongshah thngan.
“Haba ka kynhun GTF ka la dawa ban wengnoh ïa ka jingai wai ïa ka Lumpongdeng sha ki kompeni, ka Sorkar ka dei ban leh kumta ym ban shu leh kyllaiñ. Ngi pynrem jur ïa ka Sorkar bad ka dei ban khot noh ha ka miej jingïakren bad ban ai katkum ka jingdawa ka GTF,” la ong shuh shuh ki nongïalam ka VPP WKH.
Kumta ki la ban biang ba ka VPP WKH kan ai ka jingkyrshan ba pura ïa ka jingïakhih ka GTF haduh ba ka Sorkar kan sngap ïa ki jingdawa ka kynhun.
