Shillong, Ïaïong 17
U President ka Hill State People’s Democratic Party (HSPDP) u Bah K. P Pangniang u la pyntip ba ka party kam pat shim rai ban ïakhun ïa ka ilekshon MP shiteng samoi na Shillong Parliamen-tary Seat bad ka sa shim ïa ka rai hadien jong ka Central Executive Committee jong ka party.
Haba kren sha ki nongthoh khubor u Bah Pangniang u la ïathuh ba ïa ka rai ban ïakhun ilekshon ha ka ilekshon MP shiteng samoi, yn sa khot jingïalang ka Central Executive Committee ha ki sngi ki ban wan bad yn shim ïa ka rai kaba khatduh, hynrei kumba ka long mynta ka party kam shim kano-kano ka rai.
Halor ka Women’s Reservation Bill, u President ka HSPDP u la pdiang ïa ka sienjam ka Sorkar Pdeng bad pynpaw ka jingkyrmen ba yn lah pyntreikam ïa ka ha ka Jylla.
Haba kylli halor ka jingpyrshah ka Green-Tech Foundation ïa ka jingthmu ka Sorkar ban shna ïa ka projek kam jngohkai pyrthei ha Lumpongdeng, u Bah Pangniang u la ong ba ka rai jong ka Sorkar ban nym shna ïa ki jingtei hangtei ka dei ka dak kaba bha.
