Shillong, 19 Iaïong
Ki doktor ka District Medical and Health Office (DMHO) ha ka janmiet jong ka sngi u Blei ki la wan biang ban peit ïa ka koit ka khiah jong u Bah Ritre Lyngdoh, Secretary General ka Green Tech Foundation (GTF) uba la shong shah thngan ha madan Malki.
Ka jingshah thngan jong u Bah Ritre Lyngdoh ka dei hadien ba u Chairman ka GTF, u Bah H Bansiewdor Nonglang u la shah pynkit noh sha Hospital namar ba la jur palat ka jingshitom hadien ba u la shah thngan la 10 sngi lynter.
Ka jingshah thngan jong ki nongïalam ka GTF ka dei halor ka jingdawa na ka Sorkar Jylla ba ka dei ban wengnoh mardor ïa ka projek ha dewlynnong Lumpongdeng, Umiam.
Haba ïakren bad u Bah Ritre Lyngdoh u la ïathuh ba u dang sngewkhlaiñ ïa mynta ha ka met bad ki doktor ki la pyntip ba u la hiar khyndiat ka shini.
Ka jingshong shah thngan jong u Bah Ritre mynta ka la poi sha ka 48 kynta. Bad haba kheiñ kyllum lang ka jingïakhih ka GTF ka la poi sha ka 11 sngi lynter.
“Ngam pat da sngew lei-lei haduh katta-katta ha ka met namar ka don ka bor ba khraw ha ki jingduwai na ki paidbah nongkyrshan ha madan Malki,” la ong u Bah Ritre.
U la ïathuh ruh ba na ka liang ki doktor ki la pyntip ba ka met jong u ka la sdang ban tlot, hynrei halade pat u dang sngew biang bad sngew khlaiñ.
