Jowai, Ïaïong 19
“Hapoh ka jingïalam u Myntri Rangbah u Conrad K Sangma, ngi la shakri ïa ka jylla la 8 snem, naduh u snem 2018, ngan ïathuh ïa phi ka jingkylla ngi la ïohi ha kylleng sawdong jong ka Jylla Meghalaya,” ong u Symbud Myntri Rangbah ka Jylla Bah Prestone Tynsong.
Ïa kane u Bah Prestone Tynsong u la kren haba plie bad buh mawnongrim ïa ki 6 tylli ki skhim pynroi ha Nartiang bad Jowai Konstitwensi ha Wahiajer ha ka 18 tarik Ïaïong.
“Hynrei ngam lah ban klet ha u snem 2018 haduh 2023, teng teng ngi jaw ummat, ngi duh thiah duh dem, bad jia sa khlam COVID-19 kaba long kaei kaei kaba ym lah shuh bad kaba ngim lah shuh ban shemphang kum ki briew, hynrei ka jingieid ka jong U Blei ngi long kumne kumba ngi long mynta,” la ong u Bah Prestone.
Haba phai sha ki snem kiba la dep, u Bah Prestone u la pynpaw ka jingsngewtynnad ba kila lah ban pyndep ïa ki projek kiba kongsan tam ha sor Shillong. Kawei ka dei ka hotel kaba jaboh tam ka Crowborough Hotel bad phin leit hangto mynta phin sngew kumba rung ha Delhi.
Kaba ar ka dei ha Jail Road ka Marriott Hotel ha kaba ki jingïalang bapher bapher kiba ki VVIP na Delhi haba ki ju wan, la pynlong ïa ki jingïalang ha kine ki artylli ki 5 Star Hotel.
Ka long ka burom bad ka jingkyrkhu kaba khraw namar ka jingmih na kata ka long, don bun ki khun samla kiba la pyntbit ha kylleng ka sawdong jong ka ri India kiba la ïoh jinghikai, kila wanphai sha jylla bad ngan pyntip ïa phi ba mynta ki trei ha kitei ki artylli ki Hotel, la ong u Bah Prestone.
U Bah Prestone u la pynbna ruh ba ha ki khyndiat tylli ki snem sa 3-4 tylli ki 5 Star Hotel ha sor Shillong bad kumjuh sha ki pud sawdong kiba kham jngai na ka sor Shillong.
U kyrmen ba lyngba ka jinglah ban pyndep ïa kine ki projek da ki hajar ngut ki khun samla kin ïoh kam ïoh jam bad da ki hajar ngut ki samla kiba trei ha kylleng ka ri India ha kata ka por kin wanphai ban shakri ha la ka jong ka ri bad ka jylla.
Halor ka jingpyrshah kam pynroi, u Bah Prestone u la ong, “Ngi donkam ban ïa husiar, ngi donkam ïa kata ka jingpyrshah kam leilei ngi pdiang sngewbha, hynrei haba phi pyrshah, ngin ïakren ha ka miej bad pynbeit. Mano hi ba biang, ym don mano mano ruh ba biang, ngi dei tang ki briew. Wat ong ba u Bah Prestone, Bah Sniawbha kim don shuh ka jingbakla, hynrei kaba kongsan ka long ban ïakren bad pynbeit”.
Halor ka jingshah kynthoh ba ka Sorkar MDA-I&II ka tlot palat ban tehlakam ïa ka shongsuk shongsain, u Bah Prestone u la ong, “Ngan ïathuh ïa phi ba u CM, ma nga bad u Bah Sniawbha ngi rai ban long jaijai namar ngi dei ki nongïalam bad ngin pdiang ban ïakren bad ngi kwah ba ki paidbah jong ka Jylla kin sngewthuh da kaba shai kdar haba ka Sorkar ka leh ïa kano kano ka kam”.
Nalor u Bah Prestone Tynsong ha kane ka sngi la donlang ruh u Symbud Myntri Rangbah u Bah Sniawbhalang Dhar, u Myntri ka koit ka khiah u Bah Wailadmiki Shylla, ki MLA kynthup u Myntri Sorkar barim u Bah Comingone Ymbon, ka Kong Santa Mary Shylla, Nujorki Sungoh, Gabriel Wahlang, Ollan Singh Suin, Damanbait Lamare, u Commissioner and Secretary ka Sorkar u Vijay Kumar IAS, kumjuh u CEM jong ka JHADC Bah Thombor Shiwat nalor ki MDC ka JHADC kumjuh ka MDC na Nongpoh ka Kong Rona Khymdeit ki ophisar bad ki spah ngut ki paidbah.
