Shillong, Ïaïong 19
Haba phai sha ka jinglong-jingman saiñ pyrthei ha ka Jylla, ka BJP East Khasi Hills District ka la pynlong ïa ka prokram pynïasoh jong kiba bun ngut ki dkhot ha Nongdawah, Mawryngkneng ha ka Sngi Saitjaiñ, ha kaba da ki spah ngut ki nongïalam bad ki dkhot na ki seng saiñ pyrthei bad ki kynhun seng bapher-bapher ki la pynïasoh sha ka Bharatiya Janata Party (BJP).
Ïa kane ka prokram la pynlong hapoh ka jingïalam ka President ka distrik, ka Kong Priambada Blah bad nongïalam ba rangbah jong ka seng, u Bah Dhosing Mukhim.
Ki nongïalam ba rangbah ka seng kiba la don lang ki kynthup ïa u Vice-President, Bah Khrawboklang Basaïawmoit, u State Executive Member (SEM), Bah David Kharsati, President ka State Yuva Morcha, u Bah Mewaker Lyngdoh, bad kiwei-kiwei.
Ha katei ka sngi, ka District President ka la ai khublei ruh ïa u Mandal President ba dang shah jied thymmai, Bah Rimanbha Mukhim bad ai ruh ka jingkitbok-kitrwiang na ka bynta ka jinglong nongïalam bad ka jingkitkhlieh jong u.
Haba kren ha ka jingïalang, ka Kong Blah ka la ong ba ka jingïoh jingkyrshan kaba nang kiew jong ka BJP ha ki konstitwensi kum ha Mawryngkneng “ka pyni ïa ka jingnang kiew ha ka jingpdiang ïa ka seng ha ki jaka nongkyndong, ha kaba ka jingdon jong ka naduh mynbarim ka long kaba duna bha haba ïanujor bad ki jaka sor.”
Ka la ban jur ba ka jingpynheh ïa ka BJP ka pyni ïa ka jingroi kaba ïar bad ka jingkiew shaphrang na ka bynta ka Jylla.
Ka Kong Blah ka la kdew ba “katto-katne ngut ki ‘riew pawkhmat ki la pynpaw ïa ka jingkwah ban ïakhun na ka thaiñ Mawryngkneng, kaba pyni ïa ka jingshaniah kaba nang kiew ha ka jingthmu bad jingïalam jong ka seng.”
Haba ban jur ïa ka jingtrei jong ki nongtrei ka seng, ka la ong ba ki nongïalam ki ju leit sha ki jaka kiba jngai – “teng-teng palat lai kynta – ban pynïasoh bad iwei-pa-iwei i nongtrei jong ka seng ha ki jaka ba kyndong.”
Ka la ai khublei ruh ïa ka jingpyrshang ba bteng jong ki nongïalam ba rangbah bad ki nongtrei ban pynkhlaiñ ïa ka nongrim jong ka seng.
“Ha ryngkat ka jingbteng jong ka jingaiti ba kut jingmut bad ka jingïatreilang, ka BJP ka la pynkhreh ban ïoh ïa ka jingjop kaba kham khraw bad ka dang don ka jingkyrmen ban ïalam ïa ka Sorkar ha u snem 2028,” bynrap biang ka Kong Blah.
