Shillong, Ïaïong 19
U Bah Donald P Wahlang IAS, Chief Secretary barim ka Jylla u la ong ba ka jingbymdon ki khun samla Khasi ba pass ïa ka eksam IAS ka dei na ka daw ba ki samla pule ba mynta kim don shuh ïa ka jingangnud ban poi sha kaba kum kata ka thong.
“Ki samla pule ha ka Jylla jong ngi kim don ïa ka jingangnud ban ïakhun ïa ki eksam Civil Service bad kiwei de ki eksam thep kam” u la ong ba ka Jaitbynriew Khasi ka ïoh ophisar ba pass IAS khatduh dei ha u snem 2014 bad haduh mynta la bun snem ym don shuh kiba pass ïa kane ka eksam.
Shuh-shuh u la ïathuh ruh ba haba u ïakynduh ïa ki samla pule na kiwei ki Jylla kum na Arunachal Pradesh, ki ïathuh ba ki don ïa kata ka jingangnud ban ïakhun ïa kine ki exam bad ki pule kot haduh 15 ne 16 kynta ha ka shisngi, ki leit ïa ki ‘coaching class’ sha Delhi bad kim ju pynlut por ha ka ‘mobile phone’ dei na kata ka daw ba ki lah ban pass ïa ki eksam bapher-bapher khamtam ïa ka kyrdan IAS.
“Ha kane ka juk kaba mynta, ngi ngim duna ïa ki lad ki lynti, ngi don ki kolej kiba biang, ki skulbah (University) kiba biang bad ngi lah ruh ban phah pule ïa ki shabar ka Jylla kum sha Delhi, hynrei ka dawbah ba duna ki samla pule kiba lah ban pass ïa ki eksam Civil Service ka dei ba kim don ïa ka jingangnud ban poi sha khmat” u la ong.
U Bah Wahlang u la kyntu ia ki nonghikai baroh ba ki dei ban pynrung ha ki khynnah pule ia kata ka mynsiem trei shitom ban iakhun tyngeh ha ka jingpule jong ki khamtam naduh ka por ba ki dang rit.
U la pynkynmaw ruh ba ha ka por mynshwa ki nonghikai ki long shisha ki ba aiti lut na ka bynta ki samla pule bad ki ai mynsiem ïa ki khynnah ba ki dei ban ïakhun ban trei shitom bad ban pass bha ha ka jingpule jong ki.
